ރައްޔިތުންގެ ދިރިއުޅުމާ ގުޅުންހުރި އެއްވެސް މަޢުލޫމާތެއް އަލިފާނުގެ ހާދިސާގައި ނުގެއްލޭ ކަމަށް ކޮންސްޓްރަކްޝަން މިނިސްޓަރު ޑރ. އަބްދުﷲ މުއްތަލިބް މިއަދު ހާމަކުރައްވައިފި އެވެ. މިކަން އެމަނިކުފާނު ވިދާޅުވީ މިއަދު ދަރުބާރުގޭގައި ބޭއްވި ނޫސްވެރިންގެ ބައްދަލުވުމުގައެވެ.
ބުރާސްފަތި ދުވަހުގެ ހެނދުނު 6:30 ހާއިރު ހިނގި އަލިފާނުގެ ހާދިސާއިން ފެށިގެން، ރައްޔިތުންގެ މެދުގައި ފްލެޓްތަކާ ގުޅޭ މަޢުލޫމާތު ގެއްލިދާނެކަމުގެ ކަންބޮޑުވުން ފާޅުކުރަމުންދާތީ، މިނިސްޓަރު މުއްތަލިބް ވަނީ މި ކަންބޮޑުވުންތަކަށް ޖަވާބު ދެއްވާފައެވެ. އެ ގޮތުން، ހައުސިންގް ލޯނުތަކާއި އާންމު ބޯހިޔާވަހިކަމާ ގުޅުންހުރި ހުރިހާ މަޢުލޫމާތެއް ވެސް ކްލައުޑްގައި ރައްކާކުރެވިފައިވާ ކަމަށް އެމަނިކުފާނު ވިދާޅުވިއެވެ.
މި ހާދިސާގައި ރޯވި ތިން މިނިސްޓްރީގައި ވެސް ގިނަ މަޢުލޫމާތުތަކެއް ރައްކާކުރެވިފައި ހުރި ނަމަވެސް، މިހާތަނަށް ހަދާފައިވާ އެސެސްމަންޓްތަކުން ދައްކާ ގޮތުގައި ރައްޔިތުންނަށް ޚިދުމަތް ދިނުމަށް ބޭނުންވާ އެއްވެސް މަޢުލޫމާތެއް ގެއްލިފައި ނުވާކަން މިނިސްޓަރު ކަށަވަރުކޮށްދެއްވިއެވެ.
އަލިފާނުގެ ހާދިސާއާ ގުޅިގެން، މި ތިން މިނިސްޓްރީ ވަނީ ވަގުތީ ގޮތުން ދަރުބާރުގެއަށް ބަދަލުކުރެވިފައެވެ. މިނިސްޓަރުގެ ވާހަކަފުޅުގައި، މާދަމާއިން ފެށިގެން މި ތިން މިނިސްޓްރީން ވެސް ރައްޔިތުންނަށް އަނބުރާ ޚިދުމަތް ދޭން ފެށޭނެ ކަމަށް ވިދާޅުވިއެވެ.
އަލިފާނުގެ ހާދިސާ ފެށުނީ ހައުސިންގް މިނިސްޓްރީގައި ކަމަށްވާއިރު، އޭގެ ފަހުން އަލިފާން ވަނީ ކޮންސްޓްރަކްޝަން މިނިސްޓްރީއާއި އެންވަޔަރަންމަންޓް މިނިސްޓްރީއަށް ވެސް ފެތުރިފައެވެ. ހަތަރު ގަޑިއިރުގެ މަސައްކަތަކަށްފަހު އަލިފާން ނިއްވާލެވުނު އިރު، އިމާރާތް ވަނީ މުޅިން ބޭނުން ނުކުރެވޭ ވަރަށް ގެއްލުން ލިބިފައެވެ.
