ރާއްޖެ ފަދަ ގައުމުތަކަށް ބައިނަލްއަގްވާމީ އެހީތެރިކަމާއި މާލީ އެހީ ފަސޭހަކަމާއެކު ލިބުމަކީ ވަރަށް މުހިންމު ކަމެއް ކަމުގައި ފިނޭންސް މިނިސްޓަރު މޫސާ ޒަމީރު ވިދާޅުވެއްޖެއެވެ.
ކޮވިޑް-19 ބަލިމަޑުކަމުގެ ސަބަބުން ގިނަ ގައުމުތަކުގެ ހަރަދު އިތުރުވެގެން ދިޔަ ކަމަށް ޒަމީރު ފާހަގަކުރެއްވީ ނިއު ދިއްލީގައި ބޭއްވުނު ގްލޯބަލް އިކޮނޮމިކް ޕޮލިސީ ފޯރަމްގައެވެ. މި ފޯރަމް އިންތިޒާމުކޮށްފައިވަނީ ކޮންފެޑެރޭޝަން އޮފް އިންޑިއަން އިންޑަސްޓްރީ (ސީއައިއައި) އިންނެވެ.
އާންމު ހިދުމަތްތައް ދެމެހެއްޓުމަށް ހަރަދުތައް އިތުރުކުރަން މަޖުބޫރުވުމުގެ ސަބަބުން ދަރަނި އިތުރުވެފައިވާ ކަމަށާއި، މިހާރު ކުރިމަތިވެފައިވާ އެންމެ ބޮޑު ގޮންޖެހުމަކީ އެ ހަރަދުތައް މެނޭޖުކޮށް ދަރަނި ދެމެހެއްޓުން ކަމަށް މިނިސްޓަރު ފާހަގަކުރެއްވިއެވެ. މިކަމަށް ހައްލެއް ހޯދުމަށް ދަރަނި މެނޭޖުކުރުމާއި އާމްދަނީ އިތުރުކުރުމުގައި އީޖާދީ ގޮތްތަކެއް ހޯދަންޖެހޭ ކަމަށް އޭނާ ވިދާޅުވިއެވެ.
ރާއްޖެ ފަދަ ގައުމުތަކުން މެދު ރާސްތާގެ މާލީ ހަމަޖެހުން ދަމަހައްޓަމުން، ހަކަތައާއި ސާފު ބޯފެނާ ގުޅޭ ލަނޑުދަނޑިތައް ހާސިލުކުރުމަށް ކުރާ މަސައްކަތްތަކަށް މާލީ ލުއިފަސޭހަ ގޮތްތަކާއި ބައިނަލްއަގްވާމީ އެހީތެރިކަން ބޭނުންވާ ކަމަށް ޒަމީރު ވިދާޅުވިއެވެ. އަދި 2028 ވަނަ އަހަރުގެ ނިޔަލަށް ރާއްޖޭގައި ބޭނުންކުރާ ހަކަތައިގެ 33 އިންސައްތަ އިޔާދަކުރަނިވި ހަކަތައަށް ބަދަލުކުރުމަށް ރާވާފައިވާ ކަމަށްވެސް އޭނާ ފާހަގަކުރެއްވިއެވެ.
މީގެއިތުރުން، އިޔާދަކުރަނިވި ހަކަތައިގެ އިތުރުން ދެމެހެއްޓެނިވި ފަތުރުވެރިކަމާއި މޫސުމީ ބަދަލުތަކަށް ރިއާޔަތްކޮށް އުމްރާނީ ތަރައްގީގެ މަޝްރޫއުތަކަށް އިންވެސްޓްކުރަމުންދާ ކަމަށް ޒަމީރު ވިދާޅުވިއެވެ.
އަދި މިހުރިހާ ލަނޑުދަނޑިތަކެއް ހާސިލުކުރެވޭނީ މާލީ އަދި ޓެކްނޮލޮޖީގެ ގޮތުން ބައިނަލްއަގްވާމީ އެހީތެރިކަން ލިބިގެން ކަމަށް އޭނާ ވިދާޅުވިއެވެ.
