ސަރުކާރުން ޓެކްސީ ހިދުމަތް ފަށަން އުޅޭ ކަމަށް ބުނެ، ހުޅުމާލޭގައި ޓެކްސީ ޑްރައިވަރުންތަކެއް ރޭ ބޭއްވި އިހުތިޖާޖުގައި ތިން މީހަކު ހައްޔަރުކޮށް، 22 ކާރު ޓޯކޮށްފިއެވެ.
ފުލުހުން ބުނީ ހައްޔަރުކުރި ތިން މީހުންގެ ތެރެއިން އެކަކު ޝަރުތުތަކާ އެކުގައި ދޫކޮށްލާފައިވާ ކަމަށެވެ. ދެން ތިބި ދެ މީހުންގެ ބަންދަށް ފަސް ދުވަހުގެ މުއްދަތެއް ޖަހާފައިވާ ކަމަށް ވެސް ފުލުހުން ބުންޏެވެ.
ޓޯކުރީ ހުޅުމާލެއިން ހައިވޭއަށް އަރާ މަގު ބަންދުވާ ގޮތަށް ބޭއްވި 22 ޓެކްސީއެވެ. އެ ހުރިހާ ޓެކްސީއެއް ވަނީ ޓޯކޮށްފައެވެ.
ސަރުކާރުން ޓެކްސީ ހިދުމަތް ފަށަން އުޅޭ ކަމަށް ޑްރައިވަރުން ބުނި ނަމަވެސް އެކަމުގެ އަމަލީ މަސައްކަތެއް އަދި ނުފަށައެވެ. ޓެކްސީ ޑްރައިވަރުން ބުނެފައިވަނީ ސަރުކާރުން މި ހިދުމަތުގެ ތެރެއަށް ވަނުމުން އެކަމުގެ ގެއްލުން ޑްރައިވަރުންގެ އިތުރުން ޓެކްސީ ސެންޓަރުތަކާއި ގަރާޖުތަކަށް ވެސް ކުރާނެ ކަމަށެވެ.
ރާއްޖޭގައި ސަރުކާރުން ޓެކްސީ ލައިނެއް ފަށަން އުޅޭ ކަމަށް ބުނެ، އެކަމާ މެދުގައި ހިތްހަމަނުޖެހިގެން 30 ވަރަކަށް ޓެކްސީ ޑްރައިވަރުން ރޭގައި ވަނީ ހުޅުމާލޭގައި މުޒާހަރާކޮށްފައެވެ. އަދި އެ ޓެކްސީ ޑްރައިވަރުން ވަނީ ހުޅުމާލޭގައި ހުންނަ އެމްޑަބްލިއުއެސްސީ ކައިރިއަށް ޖަމާވެ، އާންމު ދަތުރުފަތުރަށް ހުރަސް އަޅައިފައެވެ. އެކަމަކު، ފުލުހުން ގޮސް އެ ކާރުތައް އެ ސަރަހައްދުން ވަނީ ނަގައިފައެވެ.
މިކަމުގެ ސަބަބުން މާލެ އާއި ހުޅުލެއަށް ދާން އުޅުނު ގިނަ ބަޔަކަށް ގިނަ ދަތިތަކާ ކުރިމަތިލާން ޖެހުނެވެ.
