އަސާސީ ހިދުމަތްތަކަށް ސަރުކާރުން ފޯރުކޮށްދޭ އެއްވެސް އެހީތެރިކަމަކަށް އުނިކަމެއް ނާންނާނެކަމަށް ރައީސް މުއިއްޒު ވިދާޅުވެއްޖެއެވެ. ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިހެން ވިދާޅުވީ އއ. މަތިވެރީ ރައްޔިތުންނާ ރޭ ބައްދަލުކުރައްވާ ވާހަކަ ދައްކަވަމުންނެވެ.
އެގޮތުން ރައްޔިތުންނަށް ލިބެމުންދާ އާސަންދަ އަދި ޕެންޝަންގެ ހިދުމަތްތައް ކުރިއަށް އޮތްތަނުގައިވެސް އެއްވެސް ބަދަލެއް ނުގެނެސް ކުރިއަށް ގެންދެވޭނެކަމުގެ ޔަގީންކަން ރައީސް ދެއްވިއެވެ. އެހެންނަމަވެސް، މި ހިދުމަތްތަކުން ނާޖާއިޒު ފައިދާ ނަގަމުންދާ ފަރާތްތަކުގެ މައްޗަށް ފިޔަވަޅު އަޅުއްވައި، އެފަދަ ހޭދަތައް މަދުކުރެވޭނެކަމަށް ރައީސް ފާހަގަކުރެއްވިއެވެ.
އެއްގޮތަކަށްވެސް އާންމު ރައްޔިތުންގެ އާސަންދައަކުން އެއްވެސް އެއްޗެއް އުންޏެއް ނުވާނެ. އެހެންވީމަ މިގޮތަށް އާސަންދަ ރިފޯމު މި ކުރަނީ. އެހެންވީމަ ވަރަށް ބޮޑުތަނުން އިސްރާފު އެބަ ކުޑަވޭ. އެހެންވީމަ މިކަހަލަ ކަންތައްތައް އަޅުގަނޑުމެން ކުރާނީ.
ރައީސް ވިދާޅުވިއެވެ.
ސަރުކާރުގެ އަމާޒަކީ މިހާރު ހިންގަމުންދާ ހުރިހާ ނިޒާމުތަކެއްވެސް އިތުރަށް ހަރުދަނާކޮށް، ރައްޔިތުންނަށް މިހާރަށްވުރެ ފެންވަރު ރަނގަޅު ހިދުމަތްތަކެއް ފޯރުކޮށްދިނުންކަމަށް ރައީސް މުއިއްޒު އިތުރަށް ވިދާޅުވިއެވެ.
މި މަސައްކަތުގެ ތެރެއިން އާސަންދައިގެ ނިޒާމަށް ގެނެވޭ އިސްލާހުތަކާ ގުޅިގެން ވަރަށް ބޮޑު މިންވަރަކަށް އިސްރާފު ކުޑަކުރެވިގެންދާނެ ކަމަށްވެސް ރައީސް ފާހަގަކުރެއްވިއެވެ.
