މާދަމާއިން ފެށިގެން ރާއްޖޭގެ ހަތަރު ސަރަހައްދަކުން އެސްޓީއޯ ރޭޓްގައި ތެޔޮ ލިބެން ފަށާނެކަމަށް ރައީސް ޑރ. މުޙައްމަދު މުޢިއްޒު އިޢުލާންކުރައްވައިފިއެވެ. މިކަން ރައީސުލްޖުމްހޫރިއްޔާ އިޢުލާންކުރެއްވީ އަރިއަތޮޅު އުތުރުބުރިއާއި މާލެ އަތޮޅުގެ ބައެއް ރަށްތަކަށް ކުރައްވަމުންގެންދަވާ ދަތުރުފުޅުގައި، ކ. ގާފަރަށް ވަޑައިގެން ރައްޔިތުންނާ ބައްދަލުކުރެއްވި ރަސްމިއްޔާތުގައެވެ.
މަސްވެރިންނަށް ހެޔޮ އަގުގައި އެސްޓީއޯ ރޭޓްގައި ތެޔޮ ފޯރުކޮށްދިނުމަށް، ކޮންމެ އަތޮޅަކުންވެސް އެއް ރަށެއްގައި މި ޚިދުމަތް ދިނުމަކީ އެމަނިކުފާނުގެ ވަޢުދެއްކަމަށް ރައީސް ވިދާޅުވިއެވެ. އަދި އަންނަ އަހަރު ކޮންމެ މަހަކު ވަކި އަތޮޅެއްގައި އެސްޓީއޯގެ ސްޓޭޝަން ޤާއިމްކޮށް، 2025 ވަނަ އަހަރު ނިމޭއިރު ކޮންމެ އަތޮޅެއްގައި ތެޔޮ ލިބޭނެ އިންތިޒާމް ހަމަޖެހިގެންދާނެކަމަށް އެމަނިކުފާނު ވިދާޅުވިއެވެ.
ނަމަވެސް، މާދަމާއިން ފެށިގެން އެސްޓީއޯގެ ފިޔުލް ސަޕްލައި މޯލްޑިވްސް (އެފްއެސްއެމް)ގެ ހިންމަފުށި، ކޫއްޑޫ، ފެލިވަރު އަދި އައްޑޫ ސިޓީ ހުޅުމީދޫގައި ހުރި ސައިޓުތަކުން އެސްޓީއޯ ރޭޓްގައި ތެޔޮ ލިބެން ފަށާނެކަމަށް ރައީސް އިޢުލާންކުރެއްވިއެވެ. އަދި މީގެއިތުރުން، ކޫއްޑޫއާއި ފެލިވަރުގައި ހުރި މިފްކޯގެ އުޅަނދުތަކުންވެސް އެސްޓީއޯ ރޭޓްގައި ތެޔޮ ވިއްކުމުގެ އިންތިޒާމް ހަމަޖެއްސުމަށް މަސައްކަތްކުރަމުންދާކަމަށާއި، އެކަން ހަމަޖެހުމުން އެ ދެ ސަރަހައްދުގައި ހުރި މިފްކޯގެ އުޅަނދުތަކުންވެސް އެސްޓީއޯ ރޭޓްގައި ތެޔޮ ލިބޭނެކަމަށް ރައީސް މުޢިއްޒު ވިދާޅުވިއެވެ.
