މި އަހަރުގެ އޮކްޓޯބަރު މަހުގެ ނިޔަލަށް ރާއްޖެއަށް ޒިޔާރަތްކުރި ޔޫރަޕުގެ ފަތުރުވެރިންގެ ނިސްބަތް ވޭތުވެދިޔަ އަހަރާ އަޅާބަލާއިރު 14.1 އިންސައްތަ އިތުރުވެއްޖެއެވެ. ޖުމްލަ 1,664,648 ފަތުރުވެރިން ރާއްޖެއަށް ޒިޔާރަތްކުރިއިރު، އޭގެތެރެއިން 963,585 ފަތުރުވެރިންނަކީ ޔޫރަޕުގެ ފަތުރުވެރިންނެވެ. މިއީ މުޅި އަހަރު ރާއްޖެއަށް ޒިޔާރަތްކުރި ފަތުރުވެރިންގެ 57.8 އިންސައްތައެވެ.

2023 ވަނަ އަހަރުގެ މި މުއްދަތުގައި ޔޫރަޕުން ޒިޔާރަތްކޮށްފައިވަނީ 843,896 ފަތުރުވެރިންނެވެ. ހަމައެހެންމެ، އޭޝިއާ ސަރަޙައްދުން އައި ފަތުރުވެރިންގެ އަދަދުވެސް ވަނީ 6.5 އިންސައްތަ އިތުރުވެފައެވެ. މިގޮތުން ވޭތުވެދިޔަ އަހަރު 467,096 ފަތުރުވެރިން އައިއިރު، މި އަހަރު އެ އަދަދު ވަނީ 497,609 އަށް އިތުރުވެފައެވެ.

ނަމަވެސް މެދުއިރުމަތީގެ ސަރަޙައްދުންނާއި އެމެރިކާ ބައްރުން އައި ފަތުރުވެރިންގެ އަދަދު ވަނީ ދަށްވެފައެވެ. މެދުއިރުމަތިން އައި ފަތުރުވެރިންގެ އަދަދު 69,687 އިން 67,224 އަށް ދަށްވެފައިވާއިރު، އެމެރިކާއިން އައި ފަތުރުވެރިންގެ އަދަދު 89,054 އިން 85,601 އަށް ދަށްވެފައިވެއެވެ. މިއީ އިންސައްތައިން ބަލާއިރު އެމެރިކާއިން 3.8 އިންސައްތަ އަދި މެދުއިރުމަތިން 3.5 އިންސައްތައިގެ ދަށްވުމެކެވެ.

ޖުމްލަ ގޮތެއްގައި، މި އަހަރުގެ ފަތުރުވެރިންގެ އަދަދު ވޭތުވެދިޔަ އަހަރާ އަޅާބަލާއިރު 9.5 އިންސައްތަ އިތުރުވެފައިވާކަން ފަތުރުވެރިކަމުގެ ތަފާސްހިސާބުތަކުން ދައްކައެވެ.