އެންސްޕާއިން ބަލިމީހަކަށް ފޯރުކޮށްދިން އެހީގެ ހުރިހާ ތަފުސީލެއް އާންމުކޮށް ހާމަކުރުމާ ގުޅިގެން އެކަމަށް ބޮޑެތި ފާޑުކިޔުންތަކެއް އަމާޒުވުމާއެކު، އެ އޭޖެންސީނ ރޭގެ ވަގުތެއްގައި އެކަމަށް މާފަށް އެދެފިއެވެ.
ކެންސަރަށް ފަރުވާކުރަމުންދާ އާއިލާގެ މެންބަރަކަށް ލިބެމުންދާ އެހީތެރިކަމާމެދު ކަންބޮޑުވުން ފާޅުކޮށް ސޯޝަލް މީޑިއާގައި ކުރެވުނު ޕޯސްޓަކަށް ޖަވާބުދާރީވުމުގެ ގޮތުން، އެންސްޕާއިން ވަނީ މިދިޔަ އަހަރުން ފެށިގެން އެ ބަލިމީހާއަށް ދޫކޮށްފައިވާ ފައިސާގެ އެހީގެ ތަފުސީލީ މަޢުލޫމާތު އާންމުކޮށް ހާމަކޮށްފައެވެ.
އާއިލާގެ މެންބަރު ސޯޝަލް މީޑިއާގައި ހިއްސާކޮށްފައިވަނީ ދޮގު މަޢުލޫމާތުތަކެއްކަމަށް ބަޔާންކޮށް ނެރުނު ނޫސްބަޔާނާ ގުޅިގެން އެންސްޕާއަށް އަމާޒުވި ގިނަ ފާޑުކިޔުންތަކަށްފަހު، އެ ނޫސްބަޔާން ސޯޝަލް މީޑިއާއިން ވަނީ ޑިލީޓްކޮށްފައެވެ. އޭގެ ފަހުން ރޭ ނެރުނު އައު ބަޔާނުގައި އެންސްޕާއިން ބުނެފައިވަނީ ބަލިމީހާއަށް ދިން އެހީގެ މަޢުލޫމާތު އާންމުކުރުމަކީ އެންމެ ރަނގަޅު ގޮތް ނޫންކަމަށް ގަބޫލުކުރާކަމަށާއި، އެކަމަށްޓަކައި މާފަށް އެދޭކަމަށެވެ.
އެންސްޕާއިން އިތުރަށް މަޢުލޫމާތު ދީފައިވާ ގޮތުގައި، އެ އިދާރާއިން ވަނީ ކަންބޮޑުވުން ފާޅުކުރި ފަރާތާ ބައްދަލުކޮށް، އެ އާއިލާއަށް އެޖެންސީން ފޯރުކޮށްދެމުންދާ އެހީތެރިކަމުގެ ތަފުސީލީ މަޢުލޫމާތު ހިއްސާކޮށްފައެވެ.
