އެމްއެމްޕީއާރްސީން އިންޓަނޭޝަނަލް ލަގްޒަރީ ޓްރެވަލް މާކެޓްގެ ފްލޭގްޝިޕް ޝޯ، އައިއެލްޓީއެމް ކާންސް 2024 ގައި ބައިވެރިވެ، ރާއްޖޭގެ ލަގްޒަރީ ފަތުރުވެރިކަމުގެ ތަޖުރިބާތައް ޕްރޮމޯޓްކުރުމުގެ މަސައްކަތް ފަށައިފިއެވެ. ފްރާންސްގެ ޕެލޭ ޑެ ފެސްޓިވަލްސް އެ ޑު ކޮންގްރޭގައި ޑިސެންބަރު 2 އިން 5 އަށް ކުރިއަށްދާ މި ހަރަކާތް ފެށިގެން ދިޔައީ ދަ ގްލޯބަލް ފޯރަމްއިންނެވެ.
ރާއްޖޭގެ ފަތުރުވެރިކަމުގެ ސިނާއަތުގެ ލަގްޒަރީ ސެކްޓަރގެ 67 ކުންފުންޏެއްގެ 12 މަންދޫބުން މި ހަރަކާތުގައި ބައިވެރިވެ، އެ ކުންފުނިތަކުގެ ތަފާތު ލަގްޒަރީ އުފެއްދުންތަކާއި ޚިދުމަތްތައް ހުށަހަޅަމުން ގެންދާނެއެވެ. މީގެ ތެރޭގައި އަލީލާ ކޮތައިފަރު މޯލްޑިވްސް، އަމިއްލަ ފުށި، ބްލިސް މޯލްޑިވްސް ޕްރައިވެޓް ލިމިޓެޑް، ފިނޮޅު ބާ އެޓޯލް މޯލްޑިވްސް، ޖޭއޭ މަނަފަރު، ދަ ނޯޓިލަސް މޯލްޑިވްސް، އަދި ވިލާ ރިސޯޓްސް ހިމެނެއެވެ.
ފްރާންސްގައި ބާއްވާ ޓްރެވަލް ޓްރޭޑް ފެއަރތަކުގެ ތެރެއިން ދުނިޔޭގެ އެންމެ ބޮޑު އެއް ލަގްޒަރީ ޓްރެވަލް ފެއަރ ކަމުގައިވާ މި ހަރަކާތުން، ބައިނަލްއަގުވާމީ މާކެޓްތަކުގެ ލަގްޒަރީ ޓްރެވަލް ޓްރޭޑް މެންބަރުންނާ ބައްދަލުކުރުމުގެ އަގުހުރި ފުރުސަތުތަކެއް ލިބިގެންދާނެއެވެ. އަދި ވިޔަފާރީގެ ބައްދަލުވުންތަކާއި، ތަޢުލީމީ ސެޝަންތަކާއި، ނެޓްވޯކިން އިވެންޓްތައް ބޭއްވުމަށް މުހިންމު ޕްލެޓްފޯމަކަށް ވެގެންދާނެއެވެ.
އެމްއެމްޕީއާރްސީން ބުނާ ގޮތުގައި މި ހަރަކާތުގައި ބައިވެރިވުމުގެ މައިގަނޑު މަގުސަދަކީ ރާއްޖޭގެ ލަގްޒަރީ ޕޮޒިޝަނިންގ ވަރުގަދަކޮށް، "ސަނީ ސައިޑް އޮފް ލައިފް" ގައި ލިބެންހުރި ޚާއްސа ތަޖުރިބާތައް ދައްކުވައިދިނުމެވެ. މި ގޮތުން ރާއްޖޭގެ ސްޓޭންޑް ވަނީ ރިސޯޓުތަކާއި ލިވަބޯޑުތަކާއި ޔުނީކް ޖިއޮގްރަފީ ހިމެނޭހެން ފަރުމާކުރެވިފައެވެ.
ފާހަގަކޮށްލެވޭ ކަމަކީ ފްރާންސަކީ މި އަހަރު ރާއްޖެއަށް 8 ވަނައަށް އެންމެ ގިނަ ފަތުރުވެރިން ޒިޔާރަތްކުރި ގައުމު ކަމާއި، ޑިސެންބަރު 1 ގެ ނިޔަލަށް 48,521 ފަތުރުވެރިން ފްރާންސްއިން ރާއްޖެއަށް ޒިޔާރަތްކޮށްފައިވާކަމެވެ.
