މާލޭ މަގުމަތީގައި އުޅޭ ބުޅާތައް ބެލެހެއްޓުމަށް ހަދާފައިވާ ޕެޓް ކެއަރ ފެސިލިޓީ މާލޭ ސިޓީ ކައުންސިލުން ވަކިކޮށް ސަރުކާރުގެ ބެލުމުގެ ދަށަށް ބަދަލުކުރަން ނިންމައިފިއެވެ. މި ނިންމުން ކައުންސިލަށް އަންގާފައިވަނީ އެ ފެސިލިޓީ އޮޕަރޭޝަނަށް ގެނެސް، ބުޅާތައް ގެންދަން ފަށާފައިވަނިކޮށެވެ.
ދަނޑުވެރިކަމާއި ދިރޭތަކެއްޗާބެހޭ މިނިސްޓްރީން މާލޭ ސިޓީ މޭޔަރު އާދަމް އާޒިމްއަށް ފޮނުވި ސިޓީއެއްގައި ބަޔާންކޮށްފައިވާ ގޮތުން، މި ނިންމުމަކީ މިދިޔަ މަހުގެ 4 ވަނަ ދުވަހު ބޭއްވުނު ވަޒީރުންގެ މަޖިލީހުގެ ޖަލްސާގައި ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމެވި ނިންމެވުމެކެވެ. އެ ޖަލްސާގައި ރައީސް އިރުޝާދު ދެއްވާފައިވަނީ ބުޅާ ފެސިލިޓީ މިނިސްޓްރީގެ ދަށުން ހިންގުމަށެވެ.
ފާހަގަކޮށްލެވޭ ގޮތުގައި، ބުޅާ ގެންގުޅޭނެ ތަނެއް ހެދުމަކީ މޭޔަރުގެ މަޤާމަށް ކުރިމަތިލެއްވިއިރު ރައީސް މުޢިއްޒު ވެވަޑައިގެންނެވި ވަޢުދެކެވެ. ނަމަވެސް، އެމަނިކުފާނުގެ މޭޔަރުކަމުގައި މި މަސައްކަތުގެ އެއްވެސް ކަމެއް ކުރެވިފައެއް ނުވެއެވެ. މި މަޝްރޫޢު ފަށައި ނިންމާލެވިފައިވަނީ މިހާރުގެ މޭޔަރު އާދަމް އާޒިމްގެ ލީޑަރޝިޕްގެ ދަށުން، ސަރުކާރުގެ ބައިވެރިވުމާއެކުގައެވެ.
އެހެންނަމަވެސް، މަސްދުވަސް ކުރިން ނިންމި މި ނިންމުން މިއަދު ކައުންސިލަށް އެންގުމުގެ ސަބަބެއް އަދި ސާފުވެފައެއް ނުވެއެވެ. މިނިސްޓްރީން ސިޓީގައި އިތުރަށް ބަޔާންކޮށްފައިވަނީ، މި ކަމާ ގުޅޭގޮތުން މަޝްވަރާކުރުމަށް ބޭއްވޭ ބައްދަލުވުމުގައި މޭޔަރު ބައިވެރިވެވަޑައިގަތުމަށް އެދިވަޑައިގެންފައިވާ ކަމަށެވެ.
