މަޖިލީހުގެ ހާރިޖީ ގުޅުންތަކުގެ ކޮމިޓީން މިއަދު، އިލެކްޝަން ކޮމިޝަންގެ ކުރީގެ ރައީސް ފުއާދު ތައުފީގް، ރާއްޖެއިން ތައިލެންޑަށް ކަނޑައަޅާ ސަފީރުކަމަށް އައްޔަން ކުރުމަށް ފެންނަ ކަމަށް ނިންމައިފިއެވެ.
މި މަޤާމަށް ފުއާދު އައްޔަންކުރުމަށް މަޖިލީހުގެ ރުހުން ހޯއްދެވުމަށް ރައީސް ޑރ. މުހައްމަދު މުއިއްޒު ހުށަހަޅުއްވާފައިވަނީ ނޮވެމްބަރު 25 ގައެވެ. ކޮމިޓީން މީގެ ކުރިން ބޭއްވި ބައްދަލުވުމެއްގައި، ފުއާދުގެ ޤާބިލުކަމަށް ރިއާޔަތްކޮށް އިތުރު އިންޓަވިއުއެއް ނުކުރުމަށް ވަނީ ނިންމާފައެވެ.
މިއަދުގެ ކޮމިޓީ ބައްދަލުވުމުގައި، ވިލިނގިލި ދާއިރާގެ ޕީއެންސީ މެންބަރު އާޒިމް އަބްދުލްއަޒީޒް ހުށަހެޅުއްވި ގޮތުން، ފޮރިން ސަރވިސްގެ ޤާނޫނުގައި ބަޔާންކުރާ ޝަރުތުތައް ފުރިހަމަވާތީ، ފުއާދުގެ ނަން ފާސްކުރެވުނެވެ. މި ނިންމުން ފާސްކުރެވިފައިވަނީ ބައްދަލުވުމުގައި ބައިވެރިވި 9 މެންބަރުންގެ އިއްތިފާޤުންނެވެ.
ފުއާދުގެ ކެރިއަރަށް ބަލާއިރު، އޭނާ އިލެކްޝަން ކޮމިޝަނުގައި މަސައްކަތް ފައްޓަވާފައިވަނީ 2008 ގައެވެ. އިންތިޤާލީ މަރުހަލާގައި، 2009 ގެ ސެޕްޓެމްބަރު 15 ގައި އޭނާ ކޮމިޝަނުގެ ރައީސްކަމާ ހަވާލުވެވަޑައިގަތެވެ. ދެވަނަ ދައުރަކަށް ކޮމިޝަނުގެ ރައީސްކަމަށް އައްޔަންކުރެވުނީ 2021 ގެ ސެޕްޓެމްބަރު 15 ގައެވެ.
ފުއާދުގެ ލީޑަރޝިޕްގެ ދަށުން، އާ ޤާނޫނުއަސާސީގެ ދަށުން ބޭއްވުނު ގިނަ މުހިންމު އިންތިޚާބުތަކެއް ވަނީ ކާމިޔާބުކަމާއެކު ބޭއްވިފައެވެ. މީގެ ތެރޭގައި 2008 ގެ ފުރަތަމަ ރިޔާސީ އިންތިޚާބު، 2009 ގެ މަޖިލިސް އިންތިޚާބު، 2011 ގެ ކައުންސިލް އިންތިޚާބު، އަދި 2013 އާއި 2023 ގެ ރިޔާސީ އިންތިޚާބުތައް ހިމެނެއެވެ.
