ފާއިތުވެދިޔަ އަހަރު ތަކުގައި ލޯން ފަންޑަޑް ޕްރޮޖެކްޓްސްގެ ޑިސްޕާސްމަންޓް އެކައުންޓިން ސިސްޓަމްގައި ރިކޯޑްކުރުމުގައި މިނިސްޓްރީން ގެންގުޅެމުންދިޔަ އުސޫލުތަކާއި ހުރި މައްސަލަތައް ހައްލުކޮށް، މާލީ ހިސާބުތަކުގެ ރެކޯޑް މިހާރު ބަލަހައްޓަމުންދަނީ އޮޑިޓަރ ޖެނެރަލްގެ ލަފާއާ އެއްގޮތަށްކަމަށް ފިނޭންސް މިނިސްޓަރ މޫސާ ޒަމީރު ވިދާޅުވެއްޖެއެެވެ.
މިއަދު ބޭއްވުނު ރައްޔިތުންގެ މަޖިލީހުގެ ޖަލްސާގައި، ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް ކުރެއްވި ސުވާލަށް ޖަވާބުދެއްވަމުން، ފިނޭންސް މިނިސްޓަރު މޫސާ ޒަމީރު މިއަދު ވިދާޅުވީ ދައުލަތުގެ މާލީ ތަފާސްހިސާބުތައް މެދުކެނޑުމެއް ނެތި އާންމުކުރެވޭނެ ނިޒާމެއް މިހާރު ވަނީ ގާއިމުކުރެވިފައިވާ ކަމުގައެވެ.
މިނިސްޓަރު ޒަމީރު ވިދާޅުވީ މިއަހަރުގެ ޖޫން މަހު ޕަބްލިކް އެކައުންޓްސް ރިކޮންސިއުލޭޝަން މަސައްކަތުގައި ބައެއް މައްސަލަތައް ފާހަގަކުރެވުނު ކަމަށެވެ. މި މައްސަލަތަކުގެ ތެރޭގައި ލޯނު އެހީގެ ދަށުން ހިންގޭ މަޝްރޫއުތަކުގެ ޚަރަދުތައް ރެކޯޑްކުރުމުގައި ގެންގުޅުނު އުސޫލުތަކާ ގުޅިގެން، ކުރީ އަހަރުތަކުގެ ޚަރަދުތަކެއް މި އަހަރުގެ ބަޖެޓުގައި ހިމެނިފައިވާ މައްސަލަ ހިމެނެއެވެ.
މިހާރު އޮޑިޓާ ޖެނެރަލް ލަފާ ދެއްވާފައި އެބަ އޮތް މިކަންތައް ކުރަންވީ ގޮތް އަދި އޭގެ އިތުރުން މިކަން އިތުރަށް ރިޕީޓްވިޔަ ނުދިނުމަށްޓަކައި މިހާރު އުސޫލުތަކެއް ކަނޑައެޅިގެން މިނިސްޓްރީން އެ އުސޫލުތަކަށް ބަދަލުކޮށްފައިވާނީ އެ އުސޫލުތަކަށް ރެކޯޑްކުރުން ކުރިއަށްގެންދާ ގޮތަށް.
މޫސާ ޒަމީރު ވިދާޅުވި އެވެ.
މިނިސްޓަރު އިތުރަށް ވިދާޅުވި ގޮތުގައި، މި މައްސަލަ ޙައްލުކުރުމަށްޓަކައި އޮޑިޓަރ ޖެނެރަލްގެ ލަފާ ހޯދުނެވެ. އަދި އެ ލަފާގެ މަތިން، މިފަދަ މައްސަލަތައް ތަކުރާރުވިޔަ ނުދިނުމަށް އައު އުސޫލުތަކެއް ވަނީ ތައާރަފުކުރެވިފައެވެ. މިގޮތުން، މާލީ ހިސާބުތައް ރެކޯޑްކުރުމުގެ މަސައްކަތް މިހާރު ކުރިއަށްދަނީ މި އައު އުސޫލުތަކާ އެއްގޮތަށެވެ. މިނިސްޓަރު ޒަމީރު އަންގަވައިދެއްވި ގޮތުގައި، މީގެ ފަހުން ފިނޭންސް މިނިސްޓްރީން އާންމުކުރަންޖެހޭ އެއްވެސް ތަފާސްހިސާބެއް ނުވަތަ ރިޕޯޓެއް ގަވާއިދުން އާންމުކުރުން ލަސްނުވާނެއެވެ.
