އިސްލާމިކް މިނިސްޓްރީން ކީރިތި ޤުރުއާން ހިތުދަސްކުރާ ޙާފިޡުން އުމްރާއަށް ފޮނުވުމުގެ މަޝްރޫއުގެ ދަށުން ފަސްވަނަ ފަރާތެއްގެ ގޮތުގައި ގއ. ދެއްވަދޫ، އަސްވާޑް، އަލްޙާފިޡާ ޝަބީނާ އާދަމަށް އުމްރާ ދަތުރުގެ ފުރުސަތު ދީފިއެވެ.
އިސްލާމިކް މިނިސްޓަރ ޑރ. މުހައްމަދު ޝަހީމް އަލީ ސައީދު ވަނީ އަލްޙާފިޡާ ޝަބީނާއާ އުމްރާ ދަތުރުގެ ލިޔެކިޔުންތައް ހަވާލުކުރައްވާފައެވެ. މި މަޝްރޫއުގެ ދަށުން މީގެ ކުރިން އަލްޙާފިޡް އަލީ ރައީފް، އަލްޙާފިޡް އާސިރު އާރިފް ޔޫސުފް، އަލްޙާފިޡް އަޛިން މުޙައްމަދު، އަދި އަލްޙާފިޡާ ސަޚިއްޔާ އަބްދުލްޣަނީއަށް ވަނީ އުމްރާގެ ފުރުސަތު ދެވިފައެވެ.
ވުޒާރާއިން މައުލޫމާތު ދެއްވާފައިވާ ގޮތުގައި މި މަޝްރޫއު ކުރިއަށް ގެންދަނީ ދީލަތި ފަރާތްތަކުގެ އެހީތެރިކަމާއެކުގައެވެ. މި އަހަރުގެ ކީރިތި ޤުރުއާން ކިޔެވުމުގެ 36 ވަނަ ޤައުމީ މުބާރާތުގެ ނިންމުމުގެ ރަސްމިއްޔާތުގައި ވަނީ ޙާފިޡުން އުމްރާއަށް ފޮނުވުމުގެ މި މަޝްރޫއު ފަށައިގަންނަ ކަމަށް އިއުލާންކުރައްވާފައެވެ.
