ދިވެހިރާއްޖޭގެ މާލީ ހާލަތު ގޯސްވެގެން މިއުޅެނީ އިސްރާފު ގިނަކަމުން ކަމަށާއި، މި ހާލަތުން އަރައިގަނެވޭނީ ވައްކަން ހުއްޓާލައިގެން ކަމުގައި އެމްޑީއޭގެ ރައީސް އަޙްމަދު ސިޔާމް މުހައްމަދު ވިދާޅުވެއްޖެއެވެ.
'ރާއްޖެ ޓީވީ’އަށް ދެއްވި ޚާއްސަ އިންޓަވިއުއެއްގައި ސިޔާމް ވިދާޅުވެފައިވަނީ، މުޅި މި ސަރަހައްދުގައި ވެސް ބޮލަކަށް ޖެހޭ އާމްދަނީއަށް ބަލާއިރު އެންމެ މުއްސަނދި ގައުމަކީ ދިވެހިރާއްޖެ ކަމަށާއި، ނަމަވެސް މި ހާލަތަށް ވެއްޓިފައިވަނީ ފައިސާއަށް ހިޔާނާތްތެރިވެވޭތީ ކަމަށެވެ. އަދި މިހާރު ދިމާވެފައިވާ އިގްތިސާދީ ހީނަރުކަމާއި ޑޮލަރުގެ ތާށިކަން ދިމާވެފައިވަނީ ފައިސާ ނުހައްގު ގޮތުގައި ބޭނުންކުރެވޭތީ ކަމަށް ވިދާޅުވިއެވެ.
ރައްޔިތުންގެ މަޖިލީހުގެ މީދޫ ދާއިރާގެ މެންބަރު ސިޔާމް އިތުރަށް ވިދާޅުވެފައިވަނީ މިދިޔަ ހުރިހާ ސަރުކާރެއްގައިވެސް ވައްކަންކުރި ކަމަށާއި، ވެރިކަންކުރި ހުރިހާ ރައީސުންވެސް ވައްކަންކުރުމުގެ ނިޔަތުގައި އެތައް ކުންފުންޏެއް ހައްދަވާފައިވާ ކަމަށެވެ. މި ކުންފުނިތައް ހިންގުމަށް ކޮންމެ އަހަރަކު ދެ ބިލިއަން ޑޮލަރު ޚަރަދުކުރެވޭ ކަމަށް ފާހަގަކުރައްވައި، ރާއްޖެއަށް އާމްދަނީގެ ގޮތުގައި ލިބެނީ 4.5 ބިލިއަން ނުވަތަ ފަސް ބިލިއަން ޑޮލަރު ކަމަށް ވިދާޅުވިއެވެ.
މި ފައިސާ ނުހައްގު ގޮތުގައި ބޭނުންކުރުމުން އަޅުގަނޑުމެންނަށް ޖެހިގެން އުޅޭ މައްސަލައެއް މިހާރު ވެސް އުޅޭ އިކޮނަމިކް ކްރައިސިސްއަކީ. ބޭރުގެ ތަންތަނަށް ދައްކަންޖެހޭ ފައިސާ ނުދެއްކި ޑޮލަރުގެ ތާށިކަން އައިސްގެން އުޅެނީ.. ފުރަތަމަ ކަމަކީ، ރާއްޖޭގެ އިގުތިސާދު ރަނގަޅުކުރަން ވެއްޖިއްޔާމުން ވައްކަންކުރުން ހުއްޓާލަންވީ.
ރައްޔިތުންގެ މަޖިލީހުގެ މީދޫ ދާއިރާގެ މެންބަރުކަން ވެސް ކުރައްވާ ސިޔާމް ވިދާޅުވިއެވެ.
ސިޔާމް މިސާލެއްގެ ގޮތުން ވިދާޅުވެފައިވަނީ އޭނާއަށް 200،000 ރުފިޔާއަށް ކްލާސްރޫމެއް ހެދޭއިރު، ސަރުކާރުން ހަދާއިރު 2 މިލިއަން ރުފިޔާ ހޭދަވާ ކަމަށެވެ. އަދި ކޮރަޕްޝަނާއި ވައްކަން ނުހުއްޓުވޭނަމަ، ކިތަންމެ ވަރަކަށް ޓެކްސް ނެގިޔަސް އިގުތިސާދު ރަނގަޅެއް ނުވާނެ ކަމަށް ވިދާޅުވިއެވެ.
މިހާރު ރާއްޖޭގެ މާލީ ހާލަތު ވަނީ ގޯސްވެފައެވެ. މޫޑީސްއިން ވަނީ ރާއްޖޭގެ ކްރެޑިޓް ރޭޓިން 'ސީއޭއޭ2’އަށް ދަށްކޮށްފައެވެ. އަދި އޭގެ ކުރިން އޮގަސްޓު 29 ގައި ފިޗުން ވެސް ވަނީ ރާއްޖޭގެ ރޭޓިން 'ސީސީ’އަށް ދަށްކޮށްފައެވެ.
އިންޑިއާއާއެކު ހެދި ކަރަންސީ ސްވޮޕް އެއްބަސްވުމުން ލިބުނު 400 މިލިއަން ޑޮލަރާއެކު ރަސްމީ ރިޒާވް 614 މިލިއަން ޑޮލަރަށް އަރާފައިވީ ނަމަވެސް، ބޭނުންކުރެވޭ ރިޒާވް ހުރީ 31.5 މިލިއަން ޑޮލަރުގައެވެ. މި ހާލަތާ ގުޅިގެން ބޭރުގެ މާލީ އިދާރާތަކުން ވަނީ އަވަސް އިސްލާހީ ފިޔަވަޅުތަކެއް އަޅަން ގޮވާލައިފައެވެ.
