ޓްއަރިޒަމް މިނިސްޓްރީން ހާމަކުރި ތަފާސް ހިސާބުތަކުން ދައްކާގޮތުގައި މިދިޔަ ނޮވެމްބަރުމަހު ރާއްޖެއަށް 172,985 ފަތުރުވެރިން ޒިޔާރަތްކޮށްފިއެވެ. މިއީ 2023 ވަނަ އަހަރުގެ ނޮވެމްބަރު މަހު ރާއްޖެއަށް ޒިޔާރަތްކުރި 163,658 ފަތުރުވެރިންނަށްވުރެ 5.7 އިންސައްތަ އިތުރު އަދަދެކެވެ.

މިއަހަރުގެ ނޮވެމްބަރުގައި ޒިޔާރަތްކުރި ފަތުރުވެރިންނާއެކު، 2024 ވަނަ އަހަރުގެ މިހާތަނަށް ޖުމުލަ 1.83 މިލިއަން ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު 153,789 ފަތުރުވެރިން އިތުރު އަދަދެކެވެ. ސަރުކާރުން މި އަހަރަށް އަމާޒުކޮށްފައިވަނީ 2 މިލިއަން ފަތުރުވެރިން ރާއްޖެއަށް ގެނައުމެވެ.

އަހަރުގެ މިހާތަނަށް އެންމެ ގިނަ ފަތުރުވެރިން ރާއްޖެއަށް ޒިޔާރަތްކޮށްފައިވަނީ ޗައިނާއިންނެވެ. އެ ޤައުމުން 251,000 ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ. ދެވަނައަށް އެންމެ ގިނަ ފަތުރުވެރިން އައިސްފައިވަނީ ރަޝިއާއިން ކަމަށްވާއިރު، އެ އަދަދަކީ 205,100 އެވެ. އިނގިރޭސިވިލާތުން 160,400 ފަތުރުވެރިންނާއެކު ތިންވަނައިގައި ހިމެނެއެވެ. ހަތަރުވަނައިގައި ވަނީ 142,400 ފަތުރުވެރިންނާއެކު ޖަރުމަނުވިލާތެވެ. އިޓަލީވިލާތުން 124,400 ފަތުރުވެރިންނާއި، އިންޑިއާއިން 113,500 ފަތުރުވެރިން، އެމެރިކާއިން 62,000 ފަތުރުވެރިން، ފްރާންސްއިން 48,100 ފަތުރުވެރިން، ސްޕެއިނުން 43,400 ފަތުރުވެރިން އަދި ސްވިޓްޒަލޭންޑުން 36,600 ފަތުރުވެރިން ރާއްޖެއަށް ޒިޔާރަތްކޮށްފައިވެއެވެ.

މިވަގުތު ރާއްޖޭގައި ފަތުރުވެރިކަމުގެ 1,249 ވިޔަފާރި ހިންގަމުންދެއެވެ. މީގެ ތެރޭގައި 171 ރިސޯޓާއި، 909 ގެސްޓްހައުސް، 155 ސަފާރީ އަދި 14 ހޮޓާ ހިމެނެއެވެ. މި ހުރިހާ ތަނެއްގައި ޖުމުލަ 62,816 އެނދު ފަތުރުވެރިންނަށް ޚިދުމަތްދިނުމަށް ޤާއިމުކުރެވިފައިވެއެވެ.