އެމެރިކާގެ ރައީސް ޖޯ ބައިޑެންގެ ފަރާތުން އެންމެ ފަހުގެ އިއުލާނަކާއެކު، އެމަނިކުފާނުގެ ދަރިކަލުން ހަންޓާ ބައިޑެންގެ މައްޗަށް ސާބިތުވެފައިވާ ޖިނާއީ ކުށުގެ މައްސަލަތަކަށް މައާފު ދެއްވައިފިއެވެ. މިއީ އެމަނިކުފާނުގެ ވެރިކަމުގެ އެންމެ ފަހު ހަފުތާގައި ނެރުއްވި އިއުލާނެކެވެ.
އުމުރުން 54 އަހަރުގެ ހަންޓާ ބައިޑެންގެ މައްޗަށް ސާބިތުވެފައިވާ ކުށްތަކުގެ ތެރޭގައި ޓެކްސް ފްރޯޑާއި، ގަވާއިދާ ޚިލާފަށް ބަޑި ގެންގުޅުމާއި، ކޮކެއިންގެ ނުފޫޒުގައި ނެތް ކަމަށް ދޮގު މައުލޫމާތު ދިނުމުގެ އިތުރުން އެހެނިހެން ދެ ކުށެއް ހިމެނެއެވެ. މި ކުށްތަކަށް އޭނާ އިއުތިރާފުވެފައިވަނީ މިދިޔަ ޖޫން މަހުގައެވެ.
ތާރީޚުގައި ފުރަތަމަ ފަހަރަށް އެމެރިކާގެ ރައީސަކު މަގާމުގައި ހުންނަވަނިކޮށް އެ ބޭފުޅެއްގެ ދަރިއެއްގެ މައްޗަށް ޖިނާއީ ކުށެއް ސާބިތުވެފައިވަނީ މި މައްސަލައިގައެވެ. މިކަމާ ގުޅިގެން ކުރިން ބައިޑެން ވިދާޅުވެފައިވަނީ މައްސަލައަށް އެއްވެސް ނުފޫޒެއް ނުފޯރުއްވާނެ ކަމަށެވެ.
އެހެންނަމަވެސް އިއްޔެ ނެރުއްވި ބަޔާނުގައި ބައިޑެން ވިދާޅުވެފައިވަނީ އަދުލު އިންސާފުގެ ނިޒާމަށް ސިޔާސީ ނުފޫޒު ވަދެ، އިންސާފު ގެއްލިގެން ގޮސްފައިވާ ކަމަށެވެ. އަދި ހަންޓާގެ މައްޗަށް ކުށް ސާބިތުވެފައިވަނީ ހަމައެކަނި އޭނާއަކީ ރައީސްގެ ދަރިއަކަށްވާތީ ކަމަށް ކޮންމެ ބުއްދިވެރިއަކު ގަބޫލުކުރާނެ ކަމަށްވެސް ވިދާޅުވެފައިވެއެވެ.
އިތުރު ތަފްސީލުތަކަށް ބަލާއިރު، ހަންޓާ ބައިޑަން ވަނީ ސެޕްޓެމްބަރު މަހު ފެޑެރަލް ޓެކްސް ފްރޯޑްގެ 9 ދައުވާއަކަށް އިއުތިރާފުވެފައެވެ. ބީބީސީގެ ރިޕޯޓުގައިވާ ގޮތުން މި މައްސަލައިގައި 17 އަހަރުގެ ޖަލު ހުކުމަކާއި، ބަޑި ގެންގުޅުނު މައްސަލައިގައި 25 އަހަރުގެ ޖަލު ހުކުމެއް އަންނާނެއެވެ. މި މައްސަލަތަކުގެ ހުކުމް އިއްވުމަށް ހަމަޖެހިފައިވަނީ މި މަހުގެ 12 އަދި 16 ވަނަ ދުވަހުއެވެ.
އެމެރިކާގެ ތާރީޚުގައި ކުރިންވެސް ރައީސުން ވަނީ އާއިލާގެ މެންބަރުންނަށް މައާފު ދެއްވާފައެވެ. މީގެ ތެރޭގައި ބިލް ކްލިންޓަން 2001 ގައި އޭނާގެ އެއްބަނޑު އެއްބަފާ ކޮއްކޮ ރޮޖާ ކްލިންޓަންއަށް ކޮކެއިންއާ ގުޅުންހުރި މައްސަލައެއްގައި މައާފު ދެއްވި މައްސަލައާއި، 2020 ގައި ޑޮނަލްޑް ޓްރަމްޕް އޭނާގެ އަންހެން ދަރިފުޅު އިވާންކާގެ ފިރިމީހާގެ ބައްޕަ، ޗާލްސް ކުޝްނާއަށް މައާފު ދެއްވި މައްސަލަ ހިމެނެއެވެ. ފާހަގަކޮށްލެވޭ ގޮތުގައި ކުޝްނާ ވަނީ ފަހުން ޓްރަމްޕްގެ ކެބިނެޓުން ފަރަންސޭސިވިލާތުގެ ސަފީރުކަމަށްވެސް އައްޔަންކުރެވިފައެވެ.
