ސަރުކާރާ މެދު ހިތްހަމަނުޖެހުން އޮތްކަން ހާމަކުރުމަކީ ބޮޑު ކުށަކަށް ވެފައިވާ ކަމަށް އެމްޑީޕީގެ ޗެއާޕާސަން ފައްޔާޒް އިސްމާއިލް މިއަދު ވިދާޅުވެއްޖެއެވެ.
ފައްޔާޒް އެގޮތަށް ވިދާޅުވީ "އެކްސް" ގައި ކުރި ޕޯސްޓަކާ ގުޅިގެން އިދިކޮޅު އެމްޑީޕީގެ އެކްޓިވިސްޓު ހުސައިން ޝާފިއު (ތުއްތު) ފުލުސް އޮފީހަށް ހާޒިރުވާން އެންގުމާ ގުޅިގެންނެވެ.
ފައްޔާޒް "އެކްސް" ގައި ވިދާޅުވީ ރައީސުލްޖުމްހޫރިއްޔާ އާއި ސަރުކާރުގެ އިސްވެރިންގެ "އަބުރުފުޅު"ގެ ހިމާޔަތުގައި ކައުންސިލަރުންނާ ދެކޮޅަށް ފިޔަވަޅު އަޅަން ފަށާފައިވާ ކަމަށެވެ. ސަރުކާރާ މެދު ހިތްހަމަނުޖެހުން އޮތްކަން ހާމަކުރުމަކީ ބޮޑު ކުށަކަށް ވެފައިވާ ކަމަށް ވެސް އޭނާ ވިދާޅުވިއެވެ.
އަދި ރައްޔިތުންގެ އަޑު ކަނޑުވާލައި ހިޔާލު ފާޅު ކުރުމަށް ހުދުމުހުތާރު ވެރިން އަބަދުވެސް ހުރަސް އަޅާނެ ކަމަށް ފައްޔާޒް ވިދާޅުވިއެވެ.
"ހިޔާލާއި ފިކުރުގައި ތަޅެއް ނޭޅުވޭނެ. މިހެން ޗިޓު ފޮނުވިޔަސް ފާޅުގައި ބަސް ބުނުމުގެ ހިތްވަރު ދިވެހިންގެ އަދި ހާއްސަކޮށް އެމްޑީޕީގެ މެމްބަރުންގެ ހުންނާނެ." ފައްޔާޒް ވިދާޅުވިއެވެ.
ތުއްތު ފުލުސް އޮފީހަށް ހާޒިރުވާން އެންގީ މާދަމާ މެންދުރު 1:30 އަށެވެ.
ފުލުހުން، ތުއްތުއަށް ފޮނުވި މެސެޖްގައި ބުނެފައިވާ ގޮތުން އޭނާ ހާޒިރުކުރަނީ މި މަހުގެ 8 ވަނަ ދުވަހު ކުރި ޕޯސްޓަކާ ގުޅިގެންނެވެ. ހަޑިހުތުރު ބަސް ބޭނުންކޮށް، ބިރުވެރިކަން އުފެދޭ ގޮތަށް ތުއްތު ކުރި ޕޯސްޓެއްގެ ގޮތުގައި ފުލުހުން ތުހުމަތު ކުރެއެވެ.
ތުއްތު ކުރި ޕޯސްޓުގައި ބުނެފައިވަނީ ސިނގިރޭޓު ފޮއްޓެއް ގަތީ 270ރ. އަށް ކަމަށެވެ. އެ ޕޯސްޓުގައި ރައީސް ޑރ. މުހައްމަދު މުއިއްޒަށް އަމާޒުކޮށް ހަޑިހުތުރު ބަސް ބޭނުންކޮށްފައިވެއެވެ. އަދި "މަށަށް ކަލޭ މަގެއް މަތިން ނުފެއްނާތި" ކަމަށް ބުނެ އިންޒާރު ދެއެވެ.
