ރާއްޖޭގައި އެންމެ ޒަމާނީ ވަސީލަތްތަކާއެކު އައު ސިނަމާއެއް އެޅުމަށް ނިންމާފައިވާ ކަމަށް ޔޫތު މިނިސްޓަރު އިބްރާހިމް ވަޙީދު (އަސްވާޑު) ވިދާޅުވެއްޖެއެވެ. މި ސަރުކާރުގެ ފަސް އަހަރުގެ ތެރޭގައި މި ޒަމާނީ ސިނަމާ ތަރައްޤީކޮށް، އެކަން ޙަޤީޤަތަކަށް ހައްދަވައިދެއްވާނެ ކަމަށް މިނިސްޓަރު ވިދާޅުވިއެވެ.
މިހާރު ރާއްޖޭގައި ރަސްމީކޮށް ފިލްމު ދައްކާ ތަނެއްގެ ގޮތުގައި ބޭނުންކުރަމުންދަނީ އޮލިމްޕަސް އެކަނި ކަމަށްވާތީ، ރާއްޖޭގެ ފިލްމު އިންޑަސްޓްރީއަށް ދަތިތަކެއް ކުރިމަތިވެފައިވާ ކަމަށް މިނިސްޓަރު ފާހަގަކުރެއްވިއެވެ. އަދި އޮލިމްޕަހަކީ ފިލްމު ދެއްކުމުގެ އިތުރުން ތަފާތު އެތައް ހަރަކާތްތަކެއް ކުރިއަށްގެންދާ ތަނަކަށްވާތީ، މިހާރު ކުރިއަރަމުން އަންނަ ފިލްމު އިންޑަސްޓްރީއަށް ދިމާވެފައިވާ ދަތިތައް ޙައްލުކުރުމަށް އިތުރު ސިނަމާއެއް ރާއްޖޭގައި ހުންނަންޖެހޭ ކަމަށް އަސްވާޑު ވިދާޅުވިއެވެ.
"މިހާރު އޮލިމްޕަސް ހޯދަން ޕްރޮޑިއުސަރުން ކިއުގައި ތިބެންޖެހެނީ. އެހެންވެ އެ މައްސަލައަށް ޙައްލެއް ހޯދައިދޭން މި ސަރުކާރުން ބޭނުންވޭ" ކަމަށް މިނިސްޓަރު ވިދާޅުވިއެވެ.
އަދި އޮލިމްޕަސް ފިޔަވައި ރާއްޖޭގެ އެއްވެސް ރަށެއްގައި ރަސްމީ ސިފައެއްގައި ފިލްމު ދައްކާނެ ސިނަމާއެއް މިވަގުތު ނެތްކަންވެސް މިނިސްޓަރު ފާހަގަކުރެއްވިއެވެ.
