ރާއްޖެއަށް ޒިޔާރަތްކުރާ ކޮންމެ ފަތުރުވެރިއަކަށްވެސް ދިވެހިންގެ އަމާންކަމާއި، އެކުވެރިކަމާއި އަދި ހުލްޤު ހެޔޮކަން އަމަލީގޮތުން ދެއްކުމަށް ނައިބް ރައީސް ހުސައިން މުޙައްމަދު ލަޠީފް އިލްތިމާސްކުރައްވައިފިއެވެ.
އެމަނިކުފާނު މިކަމަށް އިލްތިމާސް ކުރެއްވީ ދިވެހި ގައުމިއްޔަތުގެ އިސްވާރުންގެ ފުރަތަމަ މަހާސިންތާ ހުޅުވުމުގެ ރަސްމިއްޔާތުގައި ވާހަކަފުޅު ދައްކަވަމުންނެވެ.
ދިވެހި ގައުމިއްޔަތާއި ދިވެހި ބަހަށް އިސްކަންދިނުމަށް ޚާއްޞަކޮށްގެން، ރާއްޖޭގެ ތާރީޚުގައި މިހާތަނަށް އުފެއްދި ފުރަތަމަ ވުޒާރާއިން އިންތިޒާމުކޮށްގެން މިފަދަ ދަރުބާރެއް އިފްތިތާޙުކުރެވުނުކަމީ އުފަލެއްކަމުގައި ނައިބު ރައީސް ވިދާޅުވިއެވެ. އަދި ފަހުގެ ތާރީޚުގައި ދިވެހި ގައުމިއްޔަތާމެދު މަޝްވަރާކޮށް، މަޢުލޫމާތު ބަދަލުކުރުމަށް މިފަދަ މަހާސިންތާއެއް ބޭއްވިފައިނުވާކަންވެސް ފާހަގަކުރެއްވިއެވެ.
ގައުމިއްޔަތާއި އަމިއްލަވަންތަކަން ރައްކާތެރިކުރުމަށާއި އެކަމަށް ހޭލުންތެރިކަން އިތުރުކުރުމަށް އިސްވާރުންގެ މަހާސިންތާއަކީ އެޅޭ ވަރަށް ހަރުދަނާ އަދި އީޖާބީ ފިޔަވަޅެއްކަމުގައި ވިދާޅުވިއެވެ. މިނިވަން އަދި ތަހުޒީބީ ގައުމެއްގެ ގޮތުގައި އެތައް ހާސް އަހަރަކަށް ރާއްޖެ ދެމިއޮތުމަށް އެންމެ މުހިންމު ކަމަކީ ގައުމިއްޔަތު ނެގެހެއްޓުންކަމަށާއި، ގައުމިއްޔަތާމެދު ފަޚުރުވެރިވާ ބަޔަކަށް އެންމެންވެސް ވާންޖެހޭކަމަށް އެމަނިކުފާނު ވިދާޅުވިއެވެ.
މި މަހާސިންތާއިން ގައުމިއްޔަތާ ގުޅުންހުރި އަދި ދިވެހިންގެ އަމިއްލަވަންތަކަމާ ގުޅުންހުރި މުހިންމު ދާއިރާތަކުން މަޢުލޫމާތު ހުށަހެޅި، އިލްމީ މަޝްވަރާތަކެއް ކުރެވި، އާ އީޖާދީ ވިސްނުންތަކެއް ލިބިގެންދާނެކަން ޔަޤީންކަމާއެކު ވިދާޅުވިއެވެ. ދިވެހިންނަކީ އަމިއްލަ ބަހަކާއި، ސަގާފަތަކާއި، އާދަކާދަތަކަކާއި އަދި އަމިއްލަ ފަންނުވެރިކަމެއް އޮތް ބައެއްކަމަށާއި، އެއީ ރާއްޖެއަށްވުރެ ބޮޑެތި އަދި މުއްސަނދި ބައެއް ގައުމުތަކަށްވެސް ލިބިފައިނުވާފަދަ ނަސީބެއްކަމުގައި ފާހަގަކުރެއްވިއެވެ.
ތަޢުލީމީ މަންހަޖުގައި ހިމަނާފައިވާ ގައުމިއްޔަތުގެ މާއްދާއާ ގުޅޭގޮތުން ވާހަކަފުޅު ދައްކަވަމުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު އެންމެ ސަމާލުކަން ދެއްވާ އެއްކަމަކީ ދިވެހިންގެ އަމިއްލަވަންތަކަމާއި ގައުމިއްޔަތު ހިމާޔަތްކުރުންކަމަށާއި، އެ މާއްދާ އެގޮތަށް ހިމެނުމުގެ ސަބަބަކީވެސް އެއީކަމުގައި ނައިބު ރައީސް ވިދާޅުވިއެވެ.
