މާލޭ ސިޓީ ކައުންސިލުން މިއަދު ހާމަކުރި ގޮތުގައި، މާލެ ސަރަހައްދުގައި އުޅޭ ބުޅާތައް ހުޅުމާލެ ފޭސް 2ގައި އަލަށް ޤާއިމުކުރެވުނު "އޮޅު ހިޔާ" ކެޓް ޝެލްޓަރަށް ގެންދިއުމުގެ މަސައްކަތް އަންނަ މަހު ފެށުމަށް ވަނީ ހަމަޖެހިފައެވެ.
މި މަހުގެ ދެވަނަ ދުވަހު ރަސްމީކޮށް ހުޅުވުނު މި ޝެލްޓަރަކީ މާލޭގެ މަގުތަކާއި އާންމު ތަންތަނުގައި އުޅޭ ބުޅާތައް ގިނަވެ، ބުޅަލުން ޖެހޭ ބަލިތަކުން ރައްޔިތުން ސަލާމަތްކުރުމަށްޓަކައި ޤާއިމުކުރެވުނު މަރުކަޒެކެވެ. ކައުންސިލުން އެކްސްގައި ހިއްސާކުރި މަޢުލޫމާތުގައިވާ ގޮތުން، ޝެލްޓަރަށް ބުޅާތައް ބަދަލުކުރުމުގެ ފަހު މަރުހަލާގެ މަޝްވަރާތައް އެންޖީއޯތަކާއެކު މިހާރު ދަނީ ކުރިއަށެވެ.
ބުޅާތައް މަގުމަތިން ނެގުމުގެ މަސައްކަތް ޑިސެންބަރު މަހުގެ ފުރަތަމަ ހަފުތާގައި ފެށުމަށް ވަނީ ހަމަޖެހިފައެވެ. އަދި މި މަހުގެ ނުވަވަނަ ދުވަހު ކައުންސިލުން ވަނީ ޝެލްޓަރަށް ކާބޯތަކެތި ފޯރުކޮށްދޭނެ ފަރާތެއް ހޯދުމަށް އިޢުލާންކޮށްފައެވެ. ކައުންސިލުގެ މަޢުލޫމާތުގައިވާ ގޮތުން، ފުރަތަމަ ހަ މަސް ދުވަހުގެ ތެރޭގައި 500 ބުޅަލަށް ކާންދިނުމުގެ އިންތިޒާމު މިހާރު ވަނީ ހަމަޖެހިފައެވެ.
