ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އިން އެ އެޖެންސީއާ ބެހޭގޮތުން ފެތުރެމުންދާ ތުހުމަތުތަކުގެ މިނިވަން ތަޙުޤީޤެއް ހިންގުމަށް އެންޓި ކޮރަޕްޝަން ކޮމިޝަން (އޭސީސީ) ގައި އެދެފިއެވެ.
މި ތުހުމަތުތައް ފެތުރެމުން އަންނަނީ އެންސްޕާއިން މޯލްޑިވްސް މީޑިއާ ހައުސްއާއެކު ހަދާފައިވާ 34.8 މިލިއަން ރުފިޔާގެ އެއްބަސްވުމަކާ ގުޅިގެންނެވެ. މި އެއްބަސްވުމުގެ ދަށުން، އެންސްޕާ ހިންގުމަށް މއ. ސީރާޒީގެއިން ދެ ފަންގިފިލާ ވަނީ ފަސް އަހަރު ދުވަހުގެ މުއްދަތަށް ކުއްޔަށް ހިފާފައެވެ. ފިނޭންސް މިނިސްޓްރީގެ ޓެންޑަރ ބޯޑު މެދުވެރިކޮށް ހަދާފައިވާ މި އެއްބަސްވުމުގެ ދަށުން މީޑިއާ ހައުސްއިން ވަނީ ޖުމުލަ ހަތަރު ފަންގިފިލާ ކުއްޔަށް ހިފާފައެވެ. އޭގެ ތެރެއިން ދެ ފަންގިފިލާ ދޫކޮށްފައިވަނީ އެންސްޕާއަށް ކަމަށާއި އަނެއް ދެ ފަންގިފިލާ ބޭނުންކުރަމުންދަނީ "އެމްއެމް" ޓީވީގެ ބޭނުމަށް ކަމަށް ބުނެވެއެވެ. ނަމަވެސް ހަތަރު ފަންގިފިލާއަށް މަހަކު ދައްކަންޖެހޭ 580،000 ރުފިޔާ ހަމަޖައްސަނީ އެންސްޕާ މެދުވެރިކޮށް ކަމަށް ވެއެވެ.
އެންސްޕާއިން މިރޭ ނެރުނު ނޫސްބަޔާނެއްގައި ވިދާޅުވި ގޮތުގައި މި ވާހަކަތަކަކީ ހަގީގަތާ ޚިލާފު ދޮގު ވާހަކަތަކެކެވެ. އިމާރާތް ހޯދުމުގެ މުޢާމަލާތަކީ މާލީ ވުޒާރާއާއި އެންސްޕާއާ ދެމެދު، ކަނޑައެޅިފައިވާ ގަވާއިދުތަކާއި އުސޫލުތަކުގެ ތެރެއިން ކުރެވިފައިވާ މުޢާމަލާތެއް ކަމަށާއި، މިއީ އާންމުކޮށް ފިނޭންސް މިނިސްޓްރީގެ މަންސަތަކުގައި ފެންނަން ހުރި މަޢުލޫމާތުތަކެއް ކަމަށް އެޖެންސީން ބުނެފައިވެއެވެ.
މި މުއައްސަސާ އާއި މުއައްސަސާގެ މުވައްޒަފުންގެ ނަޒާހަތްތެރިކަމާ މެދު ސުވާލު އުފެދޭ ގޮތަށް ދައްކަމުންދާ ވާހަކަތަކާ ގުޅޭ ފުރިހަމަ، މިނިވަން ތަހުގީގެއް ހިންގަވައިދެއްވާ އެ ކަންކަމުގެ ތަފުސީލު ރައްޔިތުންނަށް ހާމަކޮށްދެއްވުމަށް މި އެޖެންސީންގެ ފަރާތުން އެންޓި ކޮރަޕްޝަން ކޮމިޝަންގައި އެދެމެވެ.
އެންސްޕާއިން ނެރެފައިވާ ބަޔާނުގައި ވިދާޅުވެފައި ވެއެވެ.
އެންސްޕާގެ މުވައްޒަފުން ހޯދުމާއި އެ މުވައްޒަފުންގެ ޒިންމާތައް ހަވާލުކުރުމަކީވެސް ކަނޑައެޅިފައިވާ އުސޫލުތަކުގެ ތެރެއިން ކުރެވެމުންދާ ކަންކަން ކަމަށް ބަޔާނުގައި ބުނެފައިވެއެވެ.
އަދި ރައްޔިތުންގެ އިޖުތިމާޢީ ރައްކާތެރިކަމާ ގުޅުންހުރި މުއައްސަސާތަކާއި މުވައްޒަފުންގެ ނަޒާހަތްތެރިކަމާމެދު ޝައްކު އުފެދޭ ގޮތަށް މަޢުލޫމާތު ފެތުރުން އެޖެންސީން ވަނީ ކުށްވެރިކޮށް، އެފަދަ ފަރާތްތަކާމެދު ފިޔަވަޅު އެޅުމަށް ކަމާބެހޭ މުއައްސަސާތަކަށް ހުށަހަޅާނެކަމަށް ބުނެފައެވެ.
