ސްޓޭޓް ޓްރޭޑިން އޯގަނައިޒޭޝަން (އެސްޓީއޯ) އިން ފެނަކަ ކޯޕަރޭޝަން ލިމިޓެޑް (ފެނަކަ) އެ ކުންފުނީގެ ދަށަށް ބަދަލުކުރުމަށް ކުރަމުންދިޔަ މަސައްކަތް ހުއްޓާލާއިފިއެވެ. މި ނިންމުން ނިންމާފައިވަނީ މިނިސްޓްރީ އޮފް ފިނޭންސްގެ އިރުޝާދުގެ މަތިން، މި މަހުގެ 24 ވަނަ ދުވަހު އެސްޓީއޯގެ ބޯޑުންނެވެ.
އެސްޓީއޯއިން މިކަމާ ގުޅިގެން ނެރުނު ބަޔާނުގައި ވިދާޅުވެފައިވާ ގޮތުގައި، ފެނަކައިގެ ހިއްސާ ގަތުމުގެ މަސައްކަތް ހުއްޓާލުމަށް ނިންމާފައިވަނީ އެސްޓީއޯއިން ސަރުކާރަށް ހުށަހެޅި އެކުއިސިޝަން ޕްރޮޕޯސަލްގައި ހިމެނޭ ކަންތައްތައް ކުރިއަށް ގޮސްފައިވާ މިންވަރަށް ރިއާޔަތްކޮށެވެ.
ފެނަކަ އެސްޓީއޯގެ ސަބްސިޑަރީއެއްގެ ގޮތުގައި ހަމަޖެއްސުމަށް ފުރަތަމަ ނިންމާފައިވަނީ މި އަހަރުގެ އޮގަސްޓު މަހުގައެވެ. މި ނިންމުމަކީ ފިނޭންސް މިނިސްޓްރީއިން ކުރި ދިރާސާއެއްގެ އަލީގައި، ފެނަކައިން ފޯރުކޮށްދޭ ޚިދުމަތްތައް ވަރުގަދަކޮށް، ކުންފުނީގެ ހިންގުން ހަރުދަނާކުރުމަށް ވަޒީރުންގެ މަޖިލީހުން އެރުވި ލަފަޔަކަށް ބިނާކޮށް ރައީސް މުޢިއްޒު ނިންމެވި ނިންމެވުމެކެވެ. ރައީސް އޮފީހުން އޭރު މައުލޫމާތު ދެއްވި ގޮތުގައި، މި ނިންމުމާ ގުޅިގެން ފެނަކައިގެ ސައްތައިން ސައްތަ ހިއްސާ އެސްޓީއޯއިން ގަތުމަށް ހަމަޖެހިފައިވީނަމަވެސް، އެ މަސައްކަތް މިހާރު ވަނީ ހުއްޓާލާފައެވެ.
