ދިވެހިރާއްޖޭގައި ހުންނަ އިންޑިއާ ހައިކޮމިޝަނަރ މުނު މަހަވަރު ދައުރު ފުރިހަމަކުރައްވާ ވަޑައިގަންނަވާތީ، ޚާރިޖީ ވަޒީރު ޑރ. ޢަބްދުﷲ ޚަލީލް ބުދަ ދުވަހު އޭނާއަށް ޝުކުރު އަދާކުރައްވައިފިއެވެ.
މަހަވަރު ވަނީ ބުދަ ދުވަހު މާލޭގައި ހުންނަ ޚާރިޖީ ވުޒާރާގެ މައި އޮފީހުގައި ޚަލީލާ ބައްދަލުކުރައްވާ، ވަދާޢީ ޒިޔާރަތެއް ކުރައްވާފައެވެ.
މި ބައްދަލުކުރެއްވުމުގައި، މާލެއާއި ދިއްލީގެ ގުޅުން ބަދަހިކުރުމަށް މަހަވަރު ކުރެއްވި މަސައްކަތްޕުޅުތަކަށް ޚަލީލް ވަނީ ޝުކުރު އަދާކުރައްވާފައެވެ.
އަދި ދިވެހިރާއްޖެ-އިންޑިއާ ޕާޓްނަރޝިޕްގެ ދަށުން ގުޅުން ވަރުގަދަކުރުމާއި، އުމްރާނީ ތަރައްގީއާއި، އިޖްތިމާޢީ-އިގްތިސާދީ ތަރައްގީގެ ދާއިރާތަކުން ކުރިއެރުން ހޯދުމުގައި މަހަވަރު އަދާކުރެއްވި "މުހިންމު ދައުރު" ޚަލީލް ވަނީ ފާހަގަކުރައްވާފައެވެ.
މަހަވަރު ވެސް ވަނީ ޚަލީލަށާއި ޚާރިޖީ މިނިސްޓްރީގެ ޓީމަށް އެބޭފުޅުންގެ އަބަދުވެސް ލިބިވަޑައިގަތް އެހީތެރިކަމަށް ޝުކުރު އަދާކުރައްވާފައެވެ. ދިވެހިރާއްޖެއާއި އިންޑިއާގެ ޚާއްސަ ގުޅުން ވޭތުވެދިޔަ އަހަރުތަކުގައި ވަނީ ބޮޑު ކުރިއެރުމެއް ލިބި، ދެ ގައުމުގެ ރައްޔިތުންނަށް އޭގެ ފައިދާ ލިބިފައިކަމަށް މަހަވަރު ވިދާޅުވިއެވެ.
އަދި ދިވެހިރާއްޖެއާއި އިންޑިއާގެ ދެމެދުގައި އިގްތިސާދީ އަދި ކަނޑުގެ ސަލާމަތާބެހޭ ފުރިހަމަ ބައިވެރިކަމެއް ގާއިމުކުރުމަށް އިންޑިއާގެ ބޮޑުވަޒީރު ނަރެންދްރަ މޯދީގެ ވިސްނުންފުޅު ހާސިލްކުރުމަށް ގާތުން މަސައްކަތްކުރުމަށް އިންޑިއާއިން ބޭނުންވާކަމަށް އޭނާ ވިދާޅުވިއެވެ.
މަހަވަރު ދިވެހިރާއްޖޭގައި އިންޑިއާގެ އެންމެ އިސް ޑިޕްލޮމެޓްގެ މަގާމާ ހަވާލުވެވަޑައިގަތީ 2021 ވަނަ އަހަރުގެ ނޮވެންބަރު މަހުއެވެ.
މާލެއާއި ދިއްލީގެ ގުޅުމަށް އެންމެ ހަލަބޮލި ދުވަސްވަރެއްގައި އޭނާ ވަނީ މި މަގާމު އަދާކުރައްވާފައެވެ.
މި ހަފުތާގެ ކުރީކޮޅު އިންޑިއާ ޚާރިޖީ މިނިސްޓްރީން ވަނީ މަހަވަރުގެ ބަދަލުގައި ޖީ. ބާލަސުބްރަމަނިއަން އައްޔަންކުރައްވާފައެވެ. އޭނާ މި މަގާމާ ހަވާލުވެވަޑައިގަންނަވާނީ ދިވެހިރާއްޖެއާއި އިންޑިއާ ދެމެދު ޘަގާފީ އަދި އިގްތިސާދީ ގުޅުން އަލުން ރަނގަޅުކޮށް ވަރުގަދަކުރަން މަސައްކަތްކުރަމުންދާ ދަނޑިވަޅެއްގައެވެ.
