ފުލުހުން އެ އިދާރާގެ ބެލުމުގެ ދަށުގައި ހުރި އުޅަނދުތަކުގެ މަޢުލޫމާތު އާންމުކޮށް ހާމަކޮށް، ޓޯ ކޮށްފައިވާ އުޅަނދުތައް ވެރިފަރާތުން ގެންދަން 60 ދުވަހުގެ މުހުލަތެއް ދީފިއެވެ. ފުލުހުން ހާމަކޮށްފައިވާ ގޮތުގައި، ފުލުހުންގެ ބެލުމުގެ ދަށުގައި މިވަގުތު ހުރީ ޖުމްލަ 34 އުޅަނދެވެ. މީގެ ތެރޭގައި ހިމެނެނީ 17 މޮޓޯ ސައިކަލާއި، 14 ކާރާއި، ދެ ވޭނާއި އަދި އެއް ޓްރަކެވެ.
މި އުޅަނދުތަކުގެ ވެރިފަރާތްތަކަށް ފުލުހުން ވަނީ އިއްޔެއިން ފެށިގެން 60 ދުވަހުގެ މުއްދަތެއް ދީފައެވެ. މި މުއްދަތުގެ ތެރޭގައި އުޅަނދުތައް ނުގެންގޮސްފިނަމަ، އެއްގަމު ދަތުރުފަތުރުގެ ޤާނޫނަށް ހަތަރުވަނަ އިޞްލާޙު ގެނައުމުގެ ޤާނޫނުގެ ދަށުން ކަނޑައެޅިފައިވާ އުސޫލުތަކާ އެއްގޮތަށް އެ އުޅަނދުތައް ނައްތާލެވޭނެ ކަމަށް ފުލުހުން ވަނީ އިޢުލާނުކޮށްފައެވެ.
ފާއިތުވި އަހަރު ފުލުހުން ވަނީ މާލޭ ސަރަހައްދުގައި ގަވާއިދާ ޚިލާފަށް ޕާކުކުރާ އުޅަނދުފަހަރުގައި ސްޓިކާ ޖެހުމުގެ ބަދަލުގައި، އުޅަނދުތައް ޓޯކުރުމުގެ މަސައްކަތް އިތުރުކޮށްފައެވެ. މިއީ މާލޭގެ މަގުތަކުގައި ގަވާއިދާ ޚިލާފަށް ޕާކުކުރުމުގެ މައްސަލަ ހައްލުކުރުމަށް އަޅަމުންދާ ފިޔަވަޅުތަކުގެ ތެރެއިން އެއް ފިޔަވަޅެވެ.
