ބޭންކިންގ ނިޒާމުގެ ތެރެއަށް ޑޮލަރު ނުވަންނަ ނަމަ ބޭންކްތައް ފަންކްޝަން ނުކުރާނެ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ)ގެ ގަވަރުނަރު އަޙްމަދު މުނައްވަރު މިއަދު ވިދާޅުވެއްޖެއެވެ. މިއީ ޑޮލަރު މާރުކުރުމުގެ ޤާނޫނު އެކުލަވާލަން ޖެހުނު މައިގަނޑު ސަބަބު ކަމަށް ގަވަރުނަރު ވިދާޅުވެފައިވެއެވެ.
އިއްޔެ އާންމުންގެ ޚިޔާލަށް ހުޅުވާލި ފޮރިން ކަރަންސީ ބިލުގެ ޑްރާފްޓާ ގުޅޭގޮތުން މިއަދު ބޭއްވި ނޫސްވެރިންގެ ބައްދަލުވުމުގައި ގަވަރުނަރު ވިދާޅުވެފައިވަނީ، ރާއްޖޭގައި ހަރުދަނާ ފޮރިން އެކްސްޗޭންޖު ގާނޫނެއް ނެތުމުގެ ސަބަބުން ކުރިން އެމްއެމްއޭ އޮތީ އަތްބަނދެވިފައި ކަމަށެވެ. އެކަމުގެ ސަބަބުން ރާއްޖޭގެ ބޭންކުތަކަށް ޑޮލަރު ވަނުން ވަރަށް ބޮޑަށް ދަށްވެފައިވާ ކަމަށް ގަވަރުނަރު ފާހަގަކުރެއްވިއެވެ.
ގަވަރުނަރުގެ ވާހަކަފުޅުގައި، މި މަސައްކަތް އެންމެ ފުރަތަމަ ފެށުނީ ރައީސް ނަޝީދުގެ ވެރިކަމުގައި ކަމަށާއި، އޭގެފަހުން ކޮންމެ ވެރިކަމެއްގައިވެސް މި މަސައްކަތް ކުރިއަށް ގެންގޮސްފައިވާ ކަމަށް ވިދާޅުވިއެވެ. އަދި ގަވަރުނަރުކަމަށް ވަޑައިގަތުމަށްފަހު މި މަސައްކަތުގެ ދުވެލި ހަލުވިކުރެއްވި ކަމަށާއި، ރައީސް ޑރ. މުޙައްމަދު މުޢިއްޒު މި މަސައްކަތަށް ކުރެއްވި ތާއީދަށް ޝުކުރު އަދާކުރެއްވިއެވެ.
ގަވަރުނަރު ހާމަކުރެއްވި ތަފާސްހިސާބުތަކަށް ބަލާއިރު، ކޮވިޑްގެ ކުރިން ރާއްޖޭގެ ބޭންކްތަކަށް 70 އިންސައްތަ ޑޮލަރު ވަންނަމުންދިޔަ ނަމަވެސް، މިހާރު އެ އަދަދު ވަނީ 50 އިންސައްތައަށް ދަށްވެފައެވެ. އަދި ބޭންކްތަކަށް މާރުކުރާ މިންވަރު މިހާރު ހުރީ 10 އިންސައްތައިގައެވެ. ޓޫރިޒަމް އިންޑަސްޓްރީއަށް ބަލާއިރު، ކޮވިޑްގެ ކުރިން 20 އިންސައްތަ ބޭރު ފައިސާ ބޭންކުތަކަށް ވަންނަމުންދިޔަ ނަމަވެސް، މިހާރު އެ އަދަދު ވަނީ 3 އިންސައްތައަށް ދަށްވެފައެވެ.
އެމްއެމްއޭއިން މިހާރު ޑްރާފްޓްކޮށްފައިވާ ބިލުގައި، ފަތުރުވެރިކަމުގެ ވިޔަފާރިތައް ފިޔަވާ އެހެން ވިޔަފާރިތަކުން 20 މިލިއަން ޑޮލަރަށްވުރެ ބޮޑު އާމްދަނީއެއް ލިބޭނަމަ، ރާއްޖޭގެ ބޭންކުތަކަށް ބޭރުފައިސާ ޖަމާކުރަން ލާޒިމްކޮށްފައިވެއެވެ. އަދި މި ފަރާތްތަކަށް ލިބޭ އާމްދަނީގެ 25 އިންސައްތައަށް ވުރެ ބޮޑުނުވާ ގޮތަށް ބޭންކުތަކަށް މާރުކުރުމަށް ލާޒިމްކޮށްފައިވެއެވެ. ޤާނޫނާ ޚިލާފުވާ ފަރާތްތަކަށް އެކި މިންވަރުން ޖޫރިމަނާކުރުމުގެ ބާރު އެމްއެމްއޭއަށް ލިބިދީފައިވެއެވެ.
