ކުންފުނިތަކާ ހަވާލުކޮށްފައިވާ މަޝްރޫޢުތަކަށް ބަދަލު ގެނައުމަށް ކައުންސިލްތަކުން ކުރަމުންދާ މަސައްކަތް ހުއްޓާލުމަށް އިންފްރާސްޓްރަކްޗަރ މިނިސްޓަރ ޑރ. އަބްދުﷲ މުއްޠަލިބް އެދިވަޑައިގެންފިއެވެ. ބުދަ ދުވަހު ރައްޔިތުންގެ މަޖިލީހުގައި ވާހަކަފުޅު ދައްކަވަމުން، މިކަމުގެ ސަބަބުން ކުންފުނިތަކަށާއި ދައުލަތަށް ބޮޑެތި ގެއްލުންތަކެއް ވަމުންދާ ކަމަށާއި، ތަރައްޤީގެ މަޝްރޫޢުތަކަށް ހުރަސްތަކެއް ކުރިމަތިވަމުންދާ ކަމަށް ވިދާޅުވިއެވެ.
ބުދަ ދުވަހުގެ ހެނދުނު މަޖިލީހަށް ހާޒިރުކުރެވުނު މުއްޠަލިބާ މެންބަރުން ސުވާލުކުރެއްވީ އެމެންބަރުންގެ ދާއިރާތަކުގެ އިންފްރާސްޓްރަކްޗަރ މަޝްރޫޢުތަކާ ގުޅޭގޮތުންނެވެ.
މައިގަނޑު އިދިކޮޅު ޕާޓީ އެމްޑީޕީގެ މެންބަރު، ވައިކަރަދޫ ދާއިރާގެ މެންބަރު ހުސައިން ޒިޔާދު (ފިއްޓޭ) މުއްޠަލިބާ ސުވާލުކުރެއްވީ ހދ. ކުރިނބީ ބަނދަރުގެ މަޝްރޫޢު ލަސްވަމުންދާ ސަބަބާ ގުޅޭގޮތުންނެވެ.
މުއްޠަލިބް ވިދާޅުވީ ބަނދަރު އެޅުމުގެ މަސައްކަތް ހުއްޓިފައިވަނީ ކައުންސިލުން މަޝްރޫޢުއަށް ބަދަލުތަކެއް ގެންނަން ބޭނުންވާތީ ކަމަށެވެ.
އެމަނިކުފާނު ވިދާޅުވީ އެއްބަސްވުމާ އެއްގޮތަށް މަޝްރޫޢުތައް ކުރިއަށް ގެންދިއުމުގައި އެއްބާރުލުން ދިނުމަށް ކައުންސިލްތަކުގައި އެދިވަޑައިގެންފައިވާ ކަމަށެވެ.
"މި ގެންނަ ބަދަލުތަކުގެ ސަބަބުން އެމްޓީސީސީއަށް ވަރަށް ބޮޑެތި ގެއްލުންތަކެއް ވަމުންދަނީ. އަދި ދައުލަތަށްވެސް ވަރަށް ބޮޑެތި ގެއްލުންތަކެއް ވަމުންދަނީ. އެންމެ ފުރަތަމައިނުންވެސް ބަޖެޓުގައި ލިޔެފައި ހުންނަ އަދަދުތަކަށް [ކުންފުނިތަކަށް] މަޝްރޫޢުތައް ހިންގޭކަށް ނެތް. އެއްބަސްވުމުގައި ސޮއިކުރުމަށްފަހު ބަދަލުތައް ގެންނާކަށް އަޅުގަނޑުމެން ބޭނުމެއް ނުވޭ،" އެމަނިކުފާނު ވިދާޅުވިއެވެ.
މުއްޠަލިބް ވިދާޅުވީ ކައުންސިލްތަކުން ސޮއިކޮށްފައިވާ މަޝްރޫޢުތަކަށް ބަދަލު ގެންނަން މަސައްކަތް ކުރަމުންދަނީ މަޖިލިސް މެންބަރުން މެދުވެރިކޮށް ކަމަށެވެ.
"އަދި ކުރީގައި ހިނގާފައި ހުރި ހުރިހާ ކަމެއްގެ ސަބަބުން ވެސް، ކައުންސިލްތަކުން ކުރިމައްޗަށް ގެންނަ ކޮންމެ އެއްޗެއްގައި ސޮއިކުރަމުން އެބަދޭ. ފާސްކުރަމުން އެބަދޭ. އަދި ފާސްކުރުމަށްފަހު މަޖިލިސް މެންބަރުންނާއި އެހެނިހެން ފަރާތްތައް މެދުވެރިކޮށް ބަދަލު ގެންނަން މަސައްކަތް ކުރޭ. އަދި އެގޮތަށް އެކަން ކުރެވިފައި އެބަހުރި. އެއީ މީގެ ސަބަބަކީ،" އެމަނިކުފާނު ވިދާޅުވިއެވެ.
މުއްޠަލިބް ވިދާޅުވީ އެއްބަސްވުމުގައި ސޮއިކޮށް، ކޮންޓްރެކްޓަރުންނާ ހަވާލުކުރުމަށްފަހު ބަދަލުތައް ގެނައުމުގެ ސަބަބުން ބަޖެޓް މެނޭޖްކުރުމުގައި ދަތިތަކާ ކުރިމަތިވަމުންދާ ކަމަށެވެ.
އެމަނިކުފާނު ވިދާޅުވީ މަޝްރޫޢުތައް މެދުކެނޑުމެއްނެތި ކުރިއަށް ގެންދިއުމަށްޓަކައި އެއްބަސްވުންތަކަށް ބަދަލު ނުގެނައުން މުހިންމު ކަމަށެވެ.
މުއްޠަލިބާ ކުރެވުނު ސުވާލުތައް މި ކުރެވުނީ އަތޮޅުތަކުގެ ގިނަ އިންފްރާސްޓްރަކްޗަރ ތަރައްޤީގެ މަޝްރޫޢުތައް ހުއްޓިފައިވާ ކަމަށް ބުނެ ޝަކުވާތައް އުފުލަމުންދާ ދަނޑިވަޅެއްގައެވެ.
މުއްޠަލިބް ތަކުރާރުކޮށް ވިދާޅުވި ގޮތުގައި ކުރީގެ ސަރުކާރުން 2024 ވަނަ އަހަރުގެ ދައުލަތުގެ ބަޖެޓުގައި މަޝްރޫޢުތަކަށް ލިޔެފައި ހުރީ ޙަޤީޤަތާ ނުގުޅޭ ދަށް އަދަދުތަކެއް ކަމަށާއި، އެކަމުގެ ސަބަބުން ތަރައްޤީގެ މަސައްކަތްތަކަށް ހުރަސްތަކެއް ކުރިމަތިވަމުންދާ ކަމަށެވެ.
އޭނާ ވިދާޅުވީ 2025 ވަނަ އަހަރަށް ހުށަހަޅާފައިވާ ބަޖެޓު އެކުލަވާލާފައިވަނީ މަޝްރޫޢުތައް މެދުކެނޑުމެއްނެތި ކުރިއަށް ގެންދެވޭނެ ގޮތަށް ކަމަށެވެ.
