އަންނަ އަހަރުގެ ބަޖެޓުގައި ޕްރޮޖެކްޓްތަކުގެ ތަފްސީލު ހިމަނާފައިނުވާތީ، ރައްޔިތުން ބޭނުންވާ ކަމެއް ކުރަން ޖެހޭނީ މުޒާހަރާ ކޮށްގެން ކަމަށް ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވެއްޖެއެވެ.
ޓީވީ ޕްރޮގްރާމެއްގައި ވާހަކަދައްކަވަމުން މައުރޫފް ވިދާޅުވީ، އަންނަ އަހަރަށް ހުށަހަޅާފައިވާ 56.6 ބިލިއަން ރުފިޔާގެ ބަޖެޓުގައި، ރަށްރަށުގައި ހިންގަން ނިންމާފައިވާ މަޝްރޫއުތަކުގެ އެއްވެސް ތަފްސީލެއް ނެތް ކަމަށެވެ. އަދި މީގެ ކުރިން ސަރުކާރުން ބަޖެޓު ހުށަހެޅި ކޮންމެ ފަހަރަކުވެސް ކޮންމެ ރަށެއްގައި ހިންގާނެ ޕްރޮޖެކްޓްތަކުގެ ތަފްސީލު ހިމަނާފައި ވާނެ ކަމަށް މައުރޫފް ފާހަގަކުރެއްވިއެވެ.
މައުރޫފް ވިދާޅުވި ގޮތުގައި މިހާރު ބަޖެޓް އޮތް ގޮތުން ޕްރޮޖެކްޓްތައް ހިންގުމުގެ މުޅި ބާރު އޮތީ ރައީސްގެ އަތްޕުޅުގައި ކަމަށާއި، މިކަމާ ގުޅިގެން ވަޒީރުންނާ ސުވާލުކުރުމުގެ ފުރުސަތު ވެސް މެންބަރުންނަށް ނޯންނާނެއެވެ. އެހެންކަމުން މިސާލަކަށް ކެންދޫގައި ކަމެއް ކުރަން ބޭނުންވާނަމަ، ކެންދޫ ރައްޔިތުން މުޒާހަރާކުރަން ޖެހޭނެ ކަމަށާއި، ގިނައިން މުޒާހަރާކުރާ ރަށަކަށް ގިނަ ޕްރޮޖެކްޓް ލިބޭނެ ކަމަށް އޭނާ ވިދާޅުވިއެވެ.
އެހެންނަމަވެސް މައުރޫފްގެ މި ވާހަކަފުޅާ ޚިލާފަށް، ރައްޔިތުންގެ މަޖިލީހުގައި ވާހަކަފުޅު ދައްކަވަމުން ފިނޭންސް މިނިސްޓަރު މޫސާ ޒަމީރު ވިދާޅުވެފައިވަނީ އަންނަ އަހަރު ރާއްޖޭގެ ހުރިހާ ރަށެއްގައި ޕްރޮޖެކްޓްތައް ހިންގާނެ ކަމަށެވެ. މިނިސްޓަރު ޒަމީރު ވިދާޅުވި ގޮތުގައި ތަރައްގީގެ މަޝްރޫއުތައް ހިންގަން ކަނޑައަޅާފައިވަނީ ރައީސް ޑރ. މުހައްމަދު މުއިއްޒު އިސްކަން ދެއްވާ ލިސްޓުގެ ތަރުތީބުން ކަމަށާއި، މި ލިސްޓުން އެއްވެސް ރަށެއް އުނިވެފައެއް ނޯންނާނެއެވެ.
