އެމްއެމްއޭއިން ބޭރު ފައިސާއާ ބެހޭ އައު ބިލެއް ޑްރާފްޓްކޮށް، އާންމު ރައްޔިތުންގެ ޚިޔާލު ހޯދުމަށް ހުޅުވާލާއިފިއެވެ. މި ބިލުގައި ރިސޯޓުތަކުން ލިބޭ ޑޮލަރު ބޭންކުތަކަށް މާރުކުރުމުގައި ލުއިގޮތްތަކެއް ހިމަނާފައިވެއެވެ.
ބިލުގައި ޓޫރިޒަމް ދާއިރާގެ ވިޔަފާރިތައް ދެ ކެޓަގަރީއަކަށް ބަހާލާފައިވެއެވެ. ފުރަތަމަ ކެޓަގަރީ ކަމުގައިވާ "އޭ" ގައި ހިމެނެނީ ރިސޯޓުތަކާއި، އިންޓަގްރޭޓަޑް ޓޫރިސްޓް ރިސޯޓުތަކާއި، ޕްރައިވެޓް އައިލެންޑްތަކާއި، ރިސޯޓު ހޮޓާތަކެވެ. މި ތަންތަނުން ކޮންމެ ޓޫރިސްޓަކަށް ބޮލަކަށް 500 ޑޮލަރު ރާއްޖޭގެ ބޭންކަކަށް މާރުކުރަން ޖެހޭނެއެވެ.
ދެވަނަ ކެޓަގަރީ ކަމުގައިވާ "ބީ" ގައި ހިމެނޭ ގެސްޓްހައުސްތަކާއި ޓޫރިސްޓް އުޅަނދުތަކުން ކޮންމެ ޓޫރިސްޓަކަށް މަހަކު 25 ޑޮލަރުގެ ރޭޓުން ބޭންކަކަށް ޖަމާކޮށް މާރުކުރަން ޖެހޭނެއެވެ. ނަމަވެސް ރިސޯޓުގައި 24 ގަޑިއިރު ހޭދަނުކުރާ ޓޫރިސްޓުންނާއި، ދެ އަހަރުން ދަށުގެ ކުޑަކުދިންނާއި، ހިލޭ ތިބޭ ފަރާތްތަކަށް މި ގަވާއިދު ނުހިނގާނެއެވެ.
މީގެ އިތުރުން، އަހަރަކު 20 މިލިއަން އެމެރިކާ ޑޮލަރަށްވުރެ ގިނައިން ބޭރު ފައިސާ ލިބޭ ވިޔަފާރިތަކުން، އެ ލިބޭ އާމްދަނީގެ ތެރެއިން މަހެއްގެ މައްޗަށް 25 ޕަސެންޓަށްވުރެ ބޮޑުނުވާ އަދަދެއް ރާއްޖޭގެ ބޭންކު އެކައުންޓަކަށް ޖަމާކުރަން ޖެހޭނެއެވެ.
މި ބިލަކީ ވިޔަފާރިތަކާއި ރައްޔިތުންގެ މަސްލަހަތާ ގުޅިފައިވާ ބިލަކަށްވާތީ، އެމްއެމްއޭއިން ވަނީ އާންމުންގެ ޚިޔާލު ހޯދުމަށް ހުޅުވާލާފައެވެ. އާންމުންނަށް މި ބިލާ ގުޅޭގޮތުން ކޮމެންޓް ކުރުމުގެ ފުރުސަތު އަންނަ މަހުގެ އެއްވަނަ ދުވަހުގެ މެންދުރު 2 އާ ހަމައަށް ހުޅުވާލާފައިވާއިރު، ކޮމެންޓްތައް [email protected] އަށް ފޮނުވުމަށް އެދިފައިވެއެވެ.
