މާލޭގެ އަމީނީމަގުގައި ހުންނަ ފުރުގާން މިސްކިތަށް ގެއްލުން ދިނުމުގެ މައްސަލައެއްގައި 30 އަހަރުގެ މީހަކު ފުލުހުން ހައްޔަރުކޮށްފިއެވެ. އެ މައްސަލާގައި ކްރިމިނަލް ކޯޓުން ވަނީ 15 ދުވަހުގެ މުއްދަތަށް އެ މީހާގެ ބަންދު މުއްދަތު އިތުރުކޮށްދީފައެވެ.
މި މައްސަލަ ތިލަކުރެއްވީ ޝެއިހް އާދަމް ނިޝާނެވެ. ޝެއިހް ފޭސްބުކްގައި ކުރެއްވި ޕޯސްޓެއްގައި ވިދާޅުވެފައިވަނީ މި ޢަމަލު ހިންގާފައިވަނީ ފުރުގާން މިސްކިތުގައި އަބަދުހެން ނަމާދުގަޑިތަކުގައި ވެސް ނިދާފައި އޮންނަ، ބުއްދިފިލާ ގޮސްފައިވާ ޒުވާނެއް ކަމަށެވެ. އެ މީހާގެ ޢަމަލުތަކުގެ ތެރޭގައި މިސްކިތުގެ ފަހަތުގައި ހުރި މުސްހަފްތައް މުޅިތަނަށް އުކާލުމާއި، އިމާމް ހުންނަ ދިމާލުގެ ކަރަންޓް ބޯޑުތަކާއި އޭގައި ހަރުކޮށްފައިވާ އެޑެޕްޓަރުތައް ތަޅާލުމާއި، ވުޟޫކުރާ ތަނުގެ އިސްކުރުތައް ބިންދާލުމާއި، މިސްކިތުގެ އެހެނިހެން ތަކެތި އެތަނަށް އުކާލުން ހިމެނެއެވެ.
ޝެއިހް ނިޝާން އިތުރަށް ފާހަގަކުރެއްވި ގޮތުގައި މިއީ އެ މީހާ މިސްކިތަށް ގެއްލުން ދިން ފުރަތަމަ ފަހަރެއް ނޫނެވެ. މީގެ ކުރިންވެސް އެކި ފަހަރު މަތިން މުސްހަފްތައް އުކާލުމާއި މިފަދަ އެހެން ޢަމަލުތައްވެސް އޭނާ ވަނީ ހިންގާފައެވެ.
