ހުޅުމާލޭގައި އަލަށް ހުޅުވާލި ބުޅާ ފެސިލިޓީ "އޮޅު ހިޔާ" އަށް ބޭނުންވާ ސާޖިކަލް އިކުއިޕްމަންޓް ގަތުމަށް ބިޑް ހުށަހެޅުމަށް މާލޭ ސިޓީ ކައުންސިލުން އިއުލާން ކޮށްފިއެވެ.
އިކުއިޕްމަންޓްގެ ތެރޭގައި އިންޖެކްޝަން، ޔުރިނަރީ ކެތީޓާ، މާސްކު އަދި އަންގި ފަދަ ސާޖަރީތަކަށް ބޭނުންވާ އެކި ބާވަތްތައް ހިމެނެއެވެ. މި ސާމާނު ސަޕްލައި ކުރުމަށް ޝައުގުވެރިވާ ފަރާތްތަކުން އަންނަ މަހުގެ ހަތަރު ވަނަ ދުވަހުގެ 10:00 އަށް އަންދާސީ ހިސާބު ހުށަހަޅަން ވާނެއެވެ.
މި މަހުގެ 10 ވަނަ ދުވަހު ހުޅުވުނު މި ފެސިލިޓީއަކީ ހުޅުމާލޭ 2 ގައި 5،000 އަކަފޫޓުގެ ބިމެއްގައި ހަދާފައިވާ ތަނެކެވެ. މި ތަނަކީ މާލެ ސަރަހައްދުގެ މަގުމަތީގައި އުޅޭ ބުޅާތަކަށް ރައްކާތެރި މާހައުލެއް ހޯދައިދިނުމުގެ މަޤްޞަދުގައި ތަރައްޤީ ކުރެވިފައިވާ ފެސިލިޓީއެކެވެ.
ކައުންސިލުން ހާމަކުރި ގޮތުގައި މި ފެސިލިޓީގައި ބުޅާތައް ކަރަންޓީން ކުރެވޭ ސަރަހައްދަކާއި، ކްލިނިކެއް، އަދި ލެބޯޓްރީއެއް ހިމެނެއެވެ. މީގެ އިތުރުން ފާމަސީއަކާއި ބުޅާތަކަށް ދުވެ އުޅެވޭނެ ސަރަހައްދެއްވެސް ވަނީ ޤާއިމްކުރެވިފައެވެ. ބިޑުގައި ބައިވެރިވެވޭނީ ރާއްޖޭގައި ރަޖިސްޓްރީ ކޮށްފައިވާ ދިވެހި ކުންފުނިތަކާއި، ޕާޓްނަރޝިޕް އަދި އަމިއްލަ ވިޔަފާރިތަކަށް އެކަނި ކަމަށް ކައުންސިލުން ވަނީ އިއުލާން ކޮށްފައެވެ.
