މިނިވަން މުއައްސަސާތަކުގެ މެންބަރުން މަޤާމުން ވަކިކުރުމަށްފަހު، ދެން ސަރުކާރުން އަމާޒު ހިފާނީ ޝަރުޢީ ދާއިރާގައި ތިއްބެވި ބޭފުޅުން ވަކިކުރުމަށް ކަމަށް އިދިކޮޅު އެމްޑީޕީގެ ރައީސް ޢަބްދުﷲ ޝާހިދު މިރޭ ވިދާޅުވެއްޖެއެވެ.
ޝާހިދު މިހެން ވިދާޅުވީ، އެންޓި ކޮރަޕްޝަން ކޮމިޝަން އަދި އިލެކްޝަންސް ކޮމިޝަންގެ ނައިބު ރައީސުން ހިމެނޭގޮތަށް ދެ ކޮމިޝަންގެ ފަސް މެންބަރަކު ވަކިކުރުމަށް މިއަދު މިނިވަން މުއައްސަސާތަކާ ބެހޭ ކޮމިޓީން ނިންމުމާ ގުޅިގެންނެވެ. މީގެ އިތުރުން، މި ދެ ކޮމިޝަންގެ ރައީސުން އައްޔަންކުރުމުގެ ބާރު ރައީސުލްޖުމްހޫރިއްޔާއަށް ދިނުމަށް ސަރުކާރުން ވަނީ ދެ ބިލެއް މަޖިލީހަށް ހުށަހަޅާފައެވެ.
ރާއްޖެ ޓީވީގެ ޕްރޮގްރާމެއްގައި ވާހަކަފުޅު ދައްކަވަމުން، ޝާހިދު ފާހަގަކުރެއްވީ ވޭތުވެދިޔަ އަހަރެއްހާ ދުވަހުގެ ތެރޭގައި، ކޮންމެ ފަހަރަކު ވަކި މުއައްސަސާއެއް ރައީސުލްޖުމްހޫރިއްޔާގެ ބާރުގެ ދަށަށް ގެންދިއުމުގެ މަސައްކަތް ކުރިއަށްދާ ކަމަށެވެ. އަދި މިކަން ކުރިއަށްދަނީ ކުރިން ރޭވިފައިވާ ވަކި ތަރުތީބަކުން ކަމަށްވެސް ޝާހިދު ވިދާޅުވިއެވެ.
ޝާހިދުގެ ވާހަކަފުޅުގައި، މިހާރު މިނިވަން މުއައްސަސާތަކަށް އަމާޒުހިފުމަށްފަހު، ދެން އަންނާނީ ޖުޑިޝަރީއަށް ކަމަށާއި، މިއީ މުޅި ދައުލަތް ސަރުކާރުގެ މުށުތެރެއަށް ގެނައުމުގެ މަސައްކަތް ކަމަށް ފާހަގަކުރެއްވިއެވެ. އޭނާ އިތުރަށް ވިދާޅުވީ، އެއް އަހަރު ދުވަހުގެ ތެރޭގައި ފަހަރަކު ވަކި ތަނަކަށް އަމާޒުހިފައި، އެތަނުގައި ތިބި މީހުން ބަދަލުކޮށް، ސަރުކާރުން ބޭނުންވާ މީހުން ލައްވަމުންދާ ކަމަށެވެ.
އެއް އަހަރު ދުވަހުގެ ތެރޭ ކުރައްވާފަ ހުރި ކަންތައްތައް މިހުރީ. ފަހަރަކު ދޮރެއްގަ ޓަކި ޖައްސަވާލައްވާފަ އެތަނެއްގަ ތިބި ބަޔަކު އެ ބަދަލުކޮށްލައްވަނީ. ބޭނުންވާ ބޭފުޅުން އެ ލައްވަނީ. ދެން މިހާރު އަތްނުލެވި އޮތީ ޖުޑިޝަރީގައި.
ޝާހިދު ވިދާޅުވިއެވެ.
ކުރިން މި މަހުގެ 12 ވަނަ ދުވަހު، ސިވިލް ސަރވިސް ކޮމިޝަންގެ ރައީސް މުޙައްމަދު ނާޞިޙު އަދި އިތުރު ބައެއް މިނިވަން މުއައްސަސާތަކުގެ މެންބަރުން މަޤާމުން ވަކިކުރުމަށް ހުށަހެޅުނެވެ. މިއަދު ބޭއްވުނު ސިއްރު ބައްދަލުވުމެއްގައި، އީސީ އަދި އޭސީސީގެ ފަސް މެންބަރުން ވަކިކުރުމަށް ނިންމައި، ނާޞިޙު ވަކިނުކުރުމަށް ވަނީ ފާސްކޮށްފައެވެ.
ފާހަގަކޮށްލެވޭ ގޮތުގައި މި ސަރުކާރު ވެރިކަމަށް އައީ ޝަރުޢީ ދާއިރާ މިނިވަންކޮށް، އެ ދާއިރާއަށް ފޯރުވާ ނުފޫޒު ހުއްޓުވާނެ ކަމުގެ ވަޢުދާ އެކުގައެވެ. އަދި ސަރުކާރަށް އަހަރު ފުރުން ފާހަގަކުރި ޖަލްސާގައި ރައީސް މުޙައްމަދު މުޢިއްޒު ވިދާޅުވެފައިވަނީ، ޝަރުޢީ ދާއިރާއަށް ނުފޫޒު ފޯރުވުން ހުއްޓުވާލެވިފައިވާ ކަމަށެވެ. މިކަމުގެ ހެއްކެއްގެ ގޮތުން އެމަނިކުފާނު ވިދާޅުވެފައިވަނީ، ކުރީގެ ރައީސް ޔާމީން މިނިވަންވެ ވަޑައިގެން ހުންނެވީ، ސަރުކާރުން ވި ވަޢުދާ އެއްގޮތަށް ޝަރުޢީ ދާއިރާއަށް ނުފޫޒު ފޯރުވުން ނިމުމަކަށް ގެނައުމުގެ ސަބަބުން ކަމަށެވެ.
