ރައްޔިތުންގެ މަޖިލީހުގެ މިނިވަން މުއައްސަސާތަކުގެ ކޮމިޓީން މިއަދު ބޭއްވި ސިއްރު ބައްދަލުވުމުގައި ބައެއް މުހިންމު މުއައްސަސާތަކުގެ އިސް މަޤާމުތަކުގައި ތިއްބެވި ބޭފުޅުން ވަކިކުރުމަށް ނިންމައިފިއެވެ.
ކޮމިޓީން ވަކިކުރުމަށް ނިންމަވާފައިވަނީ އޭސީސީގެ ނައިބު ރައީސް ޢަބްދުއްސަލާމް އާއި މެންބަރު ތޯހާ މުޙައްމަދު، އަދި އިލެކްޝަންސް ކޮމިޝަނުގެ ނައިބު ރައީސް ޢަލީ ނަޝާތާއި މެންބަރުންކަމުގައިވާ ޑރ. މުޙައްމަދު ޒާހިރު އަދި މުޙައްމަދު އާޞިފްއެވެ. އެހެންނަމަވެސް ސިވިލް ސަރވިސް ކޮމިޝަނުގެ ރައީސް މުޙައްމަދު ނާޞިޙްގެ މައްސަލަ ދިރާސާކުރުމަށްފަހު އެ މަޤާމުން ވަކިނުކުރުމަށް ވަނީ ނިންމާފައެވެ.
އޭސީސީގެ މެންބަރުން ވަކިކުރުމަށް ނިންމާފައިވަނީ އެ ކޮމިޝަނުގެ ޤާނޫނުގެ 17 ވަނަ މާއްދާއާ ޚިލާފުވެފައިވާކަމަށް ތުހުމަތުކުރެވޭތީއެވެ. މި މާއްދާގައި ބަޔާންކޮށްފައިވާ ގޮތުން، ކޮމިޝަނުގެ ވާޖިބުތައް އަދާކުރުމުގައި ބިރަކަށް ނުވަތަ ނުފޫޒަކަށް ލެނބިގެން ނުވާނެއެވެ. އަދި އެއްވެސް މައްސަލައެއް ނިންމުމުގައި ނުވަތަ ސިޔާސަތެއް ކަނޑައެޅުމުގައި އަމިއްލަ މަޞްލަޙަތު ހާސިލުކޮށްގެން ނުވާނެއެވެ.
އިލެކްޝަންސް ކޮމިޝަނުގެ މެންބަރުންނާއި ސިވިލް ސަރވިސް ކޮމިޝަނުގެ ރައީސްގެ މައްސަލަ ކޮމިޓީއަށް ހުށަހަޅާފައިވަނީ ސުލޫކީ ހަމަތަކާ ޚިލާފުވެފައިވާކަމަށް ތުހުމަތުކުރެވޭތީއެވެ. މިއަދުގެ ބައްދަލުވުން ސިއްރުކުރުމަށް ހުށަހެޅުއްވީ ކެލާ ދާއިރާގެ މެންބަރު ޢަބްދުﷲ ޝަރީފެވެ. މި ހުށަހެޅުމަށް ކޮލަމާފުށީ ދާއިރާގެ މެންބަރު އިބްރާހީމް ދީދީ ތާއީދުކުރެއްވުމާއެކު، ކޮމިޓީން އެގޮތަށް ފާސްކޮށްފައިވެއެވެ.
މި މައްސަލަތަކަށް މާދަމާގެ މަޖިލިސް ޖަލްސާގައި ވޯޓަށް އެހޭނެކަމަށް ބެލެވެއެވެ. މި ނިންމުން އައިސްފައިވަނީ އޭސީސީ އަދި އިލެކްޝަންސް ކޮމިޝަނުގެ ރައީސް އަދި ނައިބު ރައީސް އައްޔަންކުރުމުގެ ބާރު ރައީސުލްޖުމްހޫރިއްޔާއަށް ދިނުމަށް އެ ކޮމިޝަންތަކުގެ ޤާނޫނަށް އިޞްލާޙެއް ހުށަހެޅިފައިވަނިކޮށެވެ.
