އިސްރާއީލްގެ ޕާސްޕޯޓުގައި ރާއްޖެ އެތެރެވުން މަނާކުރުމަށް އިމިގްރޭޝަން ޤާނޫނުގެ ހުށަހަޅާފައިވާ އިސްލާހުގެ މަސައްކަތް އަވަސްކުރުމަށް ރައްޔިތުންގެ މަޖިލީހުގެ ސަލާމަތީ ޚިދުމަތްތަކާ ބެހޭ ކޮމިޓީ (241 ކޮމިޓީ) އިން މިއަދު ފާސްކޮށްފިއެވެ.
މި ބިލު މަޖިލީހަށް ހުށަހެޅުއްވީ ގަލޮޅު ދެކުނު ދާއިރާގެ އެމްޑީޕީގެ މެމްބަރު މީކާއިލް އަހުމަދު ނަސީމެވެ. މެއި 29 ވަނަ ދުވަހު ހުށަހެޅި މި ބިލު މަޖިލީހުން ބަލައިގަނެ ކޮމިޓީއަށް ފޮނުވުމަށްފަހު، ދިގު މުއްދަތެއް ފާއިތުވެގެން ދިޔައިރުވެސް ބިލުގެ މަސައްކަތް ކުރިއަށް ނުދިޔަނަމަވެސް، މިހާރު ވަނީ މަސައްކަތް ފެށިފައެވެ. ފުރަތަމަ ކަނޑައެޅި ސުންގަޑިއަކީ 2025 ވަނަ އަހަރުގެ ފެބްރުއަރީ މަހުގެ ނިޔަލަށެވެ.
ކޮމިޓީން ވަނީ ބިލާ ގުޅޭގޮތުން މަޝްވަރާކުރުމަށް އެކި އިދާރާތަކާ ބައްދަލުކުރުމަށް ނިންމާފައެވެ. މީގެ ތެރޭގައި ހުރިހާ ސިޔާސީ ޕާޓީތަކާއި، ބަންޑާރަ ނައިބުގެ އޮފީހާއި، ޓޫރިޒަމް މިނިސްޓްރީއާއި، އިކޮނޮމިކް މިނިސްޓްރީއާއި، ޓްރާންސްޕޯޓް މިނިސްޓްރީއާއި، އިމިގްރޭޝަނާއި އަދި ފަތުރުވެރިކަމާ ގުޅުންހުރި ޖަމްޢިއްޔާތައް ހިމެނެއެވެ. މި މަޝްވަރާތައް ޑިސެމްބަރު މަހުގެ ނިޔަލަށް ނިންމުމަށް ވަނީ ރޭވިފައެވެ.
ނަމަވެސް މިއަދުގެ ކޮމިޓީ ބައްދަލުވުމުގައި ކޮމިޓީގެ މުޤައްރިރު، އޭދަފުށީ ދާއިރާގެ މެންބަރު އަހުމަދު ސަލީމް (ރެޑްވޭވް) ވިދާޅުވީ ބިލުގެ މަސައްކަތް އަވަސްކުރުމަށްޓަކައި އިދާރީ ބަދަލުތަކެއް ގެންނަން ޖެހިފައިވާ ކަމަށެވެ. އެހެންކަމުން މާދަމާއިން ފެށިގެން ކަމާގުޅޭ އިދާރާތަކާ ބައްދަލުކޮށް މަސައްކަތް ނިންމުމަށް ވަނީ ފާސްކޮށްފައެވެ.
މި ބިލުގެ މައިގަނޑު މަޤްޞަދަކީ އިސްރާއީލްގެ ޕާސްޕޯޓު އޮންނަ ފަރާތްތަކާއި، އިސްރާއީލްގެ ރައްޔިތުން އެހެން ޤައުމުތަކުގެ ޕާސްޕޯޓުގައި ވިޔަސް ރާއްޖެ އެތެރެވުން މަނާކުރުމެވެ. މިއީ ފަލަސްތީނުގެ ރައްޔިތުންނާ ދެކޮޅަށް އިސްރާއީލުން ހިންގަމުންދާ އަނިޔާވެރި ޢަމަލުތަކާ ދެކޮޅަށް ރާއްޖެއިން އަޅާ ފިޔަވަޅެކެވެ.
ކުރީގެ 19 ވަނަ މަޖިލީހުން އިސްރާއީލްގެ ޕާސްޕޯޓު މަނާކުރުމަށް ޤަރާރެއް ފާސްކޮށްފައިވީނަމަވެސް، މިހާތަނަށް އެކަމަށް ޢަމަލީ ސިފައެއް ނައިސްފައިވާތީ، މިހާރު މި ގެނެވޭ އިޞްލާޙުން އެކަން ޤާނޫނީގޮތުން ލާޒިމުކުރެވޭނެއެވެ. ރައީސް ޑރ. މުޙައްމަދު މުޢިއްޒުގެ ސަރުކާރުން ވަނީ ފަލަސްތީނުގެ މައްސަލައިގައި ވަރަށް ހަރުދަނާ މައުޤިފެއް ބާއްވައި، ޚާއްޞަކޮށް ރައީސް މުޢިއްޒު އަމިއްލަފުޅަށް ފަލަސްތީނުގެ ޙައްޤުގައި ވަރުގަދައަށް ވަކާލާތުކުރައްވަމުން ގެންދަވައެވެ.
