ހަށިގަނޑުގެ އެތެރޭގައި މަސްތުވާތަކެތި ފޮރުވައިގެން ރާއްޖެއަށް އެތެރެކުރަން މަސައްކަތްކުރި ކަމުގެ ތުހުމަތުގައި އުމުރުން 45 އަހަރުގެ ދިވެހި ފިރިހެނެއް ޝަރީޢަތް ނިމެންދެން ބަންދުކޮށްފައެވެ.
މި މީހާގެ ހަށިގަނޑުން ފުލުހުންނަށް ވަނީ ގިނަ އަދަދެއްގެ މަސްތުވާތަކެތި ހުރި ބުލެޓުތަކެއް ފެނިފައެވެ. އޭނާ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން، ކޯޓުން ނެރުނު އަމުރުގައި ބުނެފައިވަނީ މައްސަލައިގައި ތުހުމަތުކުރެވޭ މިންވަރަށް ހެއްކާއި ޤަރީނާ ހުށަހެޅިފައިވާ ކަމަށެވެ. މީގެ ތެރޭގައި ފުލުހުންގެ ބަޔާނާއި، ހުޅުމާލެ ހޮސްޕިޓަލުގެ ސީޓީ ސްކޭން ލިޔުންތަކާއި، ރިޕޯޓު އަދި އިތުރު ހެކިތައް ހިމެނެއެވެ.
ކޯޓު އަމުރުގައި އިތުރަށް ފާހަގަކޮށްފައިވާ ގޮތުގައި، އޭނާގެ ހަށިގަނޑުގެ އެތެރޭގައި ފޮރުވައިގެން އެތެރެކުރި މަސްތުވާތަކެތީގެ ބަރުދަން ޓްރެފިކިންގގެ މިންގަނޑަށް ފެތެއެވެ. އަދި އޭނާއަކީ މިފަދަ ކުށްތަކުގެ ހައްޔަރާއި ބަންދު ލޮގް ހުރި މީހަކަށްވުމާއެކު، ބަންދުން ދޫކޮށްލައިފިނަމަ ކުށް ތަކުރާރުކުރުމުގެ ފުރުސަތު އޮތް ކަމަށް ބެލެވޭތީ، މުޖުތަމަޢުގެ ސަލާމަތާއި ރައްކާތެރިކަމަށްޓަކައި ޝަރީޢަތް ނިމެންދެން ބަންދުގައި ބެހެއްޓުމަށް ވަނީ އަމުރުކޮށްފައެވެ.
