އިންޑިއާ އާއި ރާއްޖެއާ ދެމެދު ވެފައިވާ ޚާއްސަ އެއްބަސްވުމުގެ ދަށުން އެ ޤައުމުން ބޭރުކުރި ހަކުރު ޝިޕްމަންޓެއް ލަންކާއަށް ގެންދިޔަ މައްސަލަ މިހާރު ފެންމަތިވެ، ތަޙުޤީޤުކުރަން ފަށާފައެވެ.
އިންޑިއާގެ ބައެއް ނޫސްތަކުން ރިޕޯޓުކޮށްފައިވާ ގޮތުގައި، އެ ޤައުމުގެ ޓްރޭޑް މިނިސްޓްރީގެ ދަށުން އެކްސްޕޯޓާއި އިމްޕޯޓާ ގުޅޭ ކަންކަން ބަލަހައްޓާ އިދާރާ، ޑައިރެކްޓަރޭޓް ޖެނެރަލް އޮފް ފޮރިން ޓްރޭޑް (ޑީޖީއެފްޓީ) އިން މި މައްސަލަ އަންނަނީ ބަލަމުންނެވެ. އެގޮތުން އިދާރާއިން ތަޙުޤީޤުކުރަމުންދަނީ މިދިޔަ މަހުގެ 25 ވަނަ ދުވަހު އެ ޤައުމުން ބޭރުކުރި 64 ހާސް ޓަނުގެ ހަކުރުގެ ޝިޕްމަންޓެއްގެ މައްސަލައެވެ.
މި ޝިޕްމަންޓް އިންޑިއާއިން ބޭރުކޮށްފައިވަނީ ރާއްޖެއާ އެ ޤައުމާ ދެމެދު ވެފައިވާ ވިޔަފާރީގެ ޚާއްސަ އެއްބަސްވުމުގެ ދަށުން ކަނޑައަޅާފައިވާ އަގުތަކުގައި ނަމަވެސް، އޭގެ ބައެއް ލަންކާއަށް އެތެރެކުރިކަން ވަނީ ހާމަވެފައެވެ. މިކަމާ ގުޅިގެން މިހާރު ވަނީ ރާއްޖެއަށް އިންޑިއާއިން ހަކުރު އެކްސްޕޯޓުކުރުން މަޑުޖައްސާލާފައެވެ.
ލަންކާއިން ވެސް މިހާރު ވަނީ އިންޑިއާގެ ހަކުރު ޝިޕްމަންޓްތަކަށް ކްލިއަރެންސް ދިނުން މެދުކަނޑާލައި، މައްސަލަ ބަލަން ފަށާފައެވެ. އެގޮތުން އިންޑިއާއިން ރާއްޖެއަށް ފޮނުވާ ހަކުރު ލަންކާއިން ގަންނަނީ ކޮން ވިޔަފާރިވެރިންނެއްތޯ ބަލަމުންދާ ކަމަށް އިންޑިއާގެ ނޫސްތަކުގައި ވަނީ ބުނެފައެވެ.
މިދިޔަ އޮކްޓޫބަރު މަހުގެ ނިޔަލަށް، އިންޑިއާއިން ލަންކާއަށް ގެންދިޔަ ހަކުރުގެ ތެރޭގައި ރާއްޖެއަށް ދޫކުރި ހުއްދައިގެ ދަށުން ގެންގޮސްފައިވާ 80 ކޮންޓެއިނަރުގެ ހަކުރު ހިމެނޭ ކަމަށް ވެއެވެ. އާންމުވެފައިވާ ސެޕްޓެންބަރު 30 ވަނަ ދުވަހުގެ ބިލް އޮފް ލޭޑިންގއަކުން ދައްކާ ގޮތުގައި އިންޑިއާގެ ނެވާ ޝިވާ ޕޯޓުން ބޭރުކުރި 270 ޓަނުގެ ހަކުރުގެ ފައިނަލް ޕޯޓް އޮފް ޑެސްޓިނޭޝަންއަކަށްވެސް ޖަހާފައި އޮތީ ސްރީ ލަންކާގެ ކޮލަމްބޯއެވެ.
މި ޝިޕްމަންޓުގެ އިންވޮއިސްގައި ޓަނަކަށް 580 ޑޮލަރު ހިމަނައި، ކޮލަމްބޯގެ ކުންފުންޏަކުން ޔޫއޭއީގެ ޝިޕަރަކަށް ދައްކަންޖެހޭ 156,600 ޑޮލަރު ވަނީ ޖަހާފައެވެ. އަދި ކޮންސައިނީ ނުވަތަ މުދާ ލިބެންޖެހޭ ފަރާތެއްގެ ގޮތުގައި "ޓު ބީ އެޑްވައިޒްޑް" ޖަހައި، ޝިޕްކުރި ކުންފުނިން އަންގާ ފަރާތަކާ ހަވާލުކުރުމަށް ވަނީ ހަމަޖައްސާފައެވެ. މީގެ އިތުރުން ސެޕްޓެންބަރު 23 ގައިވެސް މުދާ ލިބެންވީ ފަރާތެއް ނުޖަހައި 1.5 މިލިއަން ޑޮލަރުގެ އިންވޮއިސްއެއް ހަދާފައިވެއެވެ.
ވިޔަފާރިވެރިން ތުހުމަތުކުރާ ގޮތުގައި މި ޝިޕްމަންޓްތައް ކޮލަމްބޯއަށް ޑައިވާޓްކޮށްފައި ހުންނަނީ އިންވޮއިސްތައް ބަދަލުކޮށްގެންނެވެ. އެއީ އެކްސްޕޯޓް ކުރުމަށް ބޭނުންވާ ލިޔުންތަކާއި ކަސްޓަމްސް ކްލިއަރެންސްގެ ލިޔުންތަކުގައި ބުނާ ޤައުމަކަށް ނޫނީ ޝިޕްމަންޓް އެތެރެ ނުކުރެވޭނެތީއެވެ. ކަސްޓަމްސްއިން މުދާ ދޫކުރުމުން، ބިލް އޮފް ލޭޑިންގ އެމީހުން ބޭނުންވާ ކޮންސައިނީއަކަށް ބަދަލުކުރަނީއެވެ. އަދި ބައެއް ޝިޕްމަންޓްތައް ނަވާ ޝެވާ ބަނދަރުން މެލޭޝިއާގެ ޕޯޓް ކްލަންގަށްވެސް ގޮސްފައިވެއެވެ.
އިންޑިއާއާއެކު މިހާރު ވެފައިވާ އެއްބަސްވުމުގެ ދަށުން ރާއްޖެއަށް ބޭނުންވާ ޒަރޫރީ ނުވަ ބާވަތެއް ފަސޭހަކަމާއެކު އަދި ޚާއްސަ އަގުތަކުގައި ރާއްޖެއަށް ގެނެވެއެވެ. އޭގެ ތެރޭގައި ހަނޑޫ، ހަކުރު، ފުށް، އަލުވި، ބިސް، ފިޔާ، މުގު، ހިލަ އަދި ހިލަވެލި ހިމެނެއެވެ.
