ކޮންގްރެސް ޕާޓީގެ އެތެރޭގެ އިންތިޚާބުގެ ވޯޓުލުން މިއަދު ހެނދުނު 10 އިން މެންދުރުފަހު 2 އަށް ކުރިއަށްދިޔަ ވަގުތު، ތ. ކަނޑޫދޫގައި ބޮޑު ހަމަނުޖެހުމެއް ހިނގައި، ވޯޓުފޮށި ފަޅާލާފައިވެއެވެ.
ސޯޝަލް މީޑިއާގައި މިހާރު ދައުރުވަމުންދާ ވީޑިއޯއިން ދައްކާގޮތުގައި، ވޯޓުފޮށި ކައިރީގައި ދެމީހަކު ހަމަނުޖެހުން ހިންގާފައިވެއެވެ. މި ހާދިސާގައި އެކަކު ގޮނޑިއެއްގެ މައްޗަށް ވައްޓާލާފައިވާއިރު، އެތަނުގައި ތިބި މީހުން ހަމަނުޖެހުން ހިންގި ދެމީހުން ދުރުކުރަން މަސައްކަތްކޮށްފައިވެއެވެ. އަދި ވީޑިއޯއިން ފެންނަ ގޮތުގައި އެވަގުތު ވޯޓުފޮށިވެސް އެތަނުން ދުރުކޮށްފައިވެއެވެ.
ޕީއެންސީގެ މި އިންތިޚާބުގެ ވޯޓުލުން ވަނީ ހއ އިން ފެށިގެން އައްޑޫ ސިޓީއާ ހަމައަށް، ޖުމްލަ 18 އަތޮޅެއްގެ ރަށްތަކުގައި ކުރިއަށް ގެންގޮސްފައެވެ. ޕީއެންސީން މަޢުލޫމާތު ދީފައިވާ ގޮތުގައި މާލެ ހިމެނޭހެން 90 ރަށެއްގައި 143 ވޯޓުފޮށި ބަހައްޓައިގެން ވޯޓުލުން ކުރިއަށް ގެންގޮސްފައިވެއެވެ.
މި އިންތިޚާބުގައި ޖުމްލަ 667 ކެންޑިޑޭޓުން ވާދަކުރާއިރު، ޕީއެންސީގެ 59 ދާއިރާއަކަށް މެންބަރުން އިންތިޚާބުކުރެވޭނެ ކަމަށް އެ ޕާޓީން ބުނެފައިވެއެވެ. އަދި އާންމުކޮށްފައިވާ ކެންޑިޑޭޓުންގެ ލިސްޓުން ދައްކާގޮތުން، ޖުމްލަ 91 ދާއިރާގެ ތެރެއިން 32 ދާއިރާއެއްގެ މަޤާމުތަކަށް އިންތިޚާބަކާ ނުލައި މެންބަރުން ވަނީ ހޮވިފައެވެ.
ޕީއެންސީން ހާމަކޮށްފައިވާ ގޮތުގައި މި އިންތިޚާބުގައި ވޯޓުލުމުގެ ޙައްޤު ލިބިގެންވަނީ 34,904 ފަރާތަކަށެވެ. މި އިންތިޚާބު ބޭއްވުމަށް އެންމެ ފުރަތަމަ ހަމަޖެހިފައިވަނީ މިދިޔަ މަހުގެ 19 ވަނަ ދުވަހު ކަމަށްވީ ނަމަވެސް، އެ ތާރީޚު ވަނީ ދެފަހަރެއްގެ މަތިން ފަސްކޮށްފައެވެ. އަދި މި އިންތިޚާބު ބާއްވާނެކަން ޕީއެންސީން އިޢުލާންކޮށްފައިވަނީ މިދިޔަ ސެޕްޓެންބަރު މަހުގައެވެ.
