ރާއްޖެއިން ދީނީ އިލްމު ހާސިލުކުރާ ފަރާތްތަކަށް ދީނީ ނަސޭހަތް ދެވޭގޮތަށް ދަރަޖަކުރުމަށް ސަރުކާރުން ވިސްނާ ކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
މިއަދު ބޭއްވި ފަތުވާ މަހާސިންތާ ފެށުމުގެ ރަސްމިއްޔާތުގައި ވާހަކަފުޅު ދައްކަވަމުން ޑރ. ޝަހީމް ވިދާޅުވީ، ދިވެހިރާއްޖޭގައި ފަތުވާ ދިނުމާއި ދީނީ ނަސޭހަތް ދިނުން ދަރަޖަކުރުމަކީ ދީނީ އެއްބައިވަންތަކަން ގާއިމްކުރުމަށް ކޮންމެހެން ކުރަންޖެހޭ ކަމެއްގެ ގޮތުގައި ސަރުކާރުން ދެކޭ ކަމަށެވެ.
ބައެއް ދަރިވަރުން ކިޔަވާފައިތިބެނީ އަރަބިބަހުން. އެކުދިންނަށް އަރަބި ބަސްވެސް އެނގޭ. އިނގިރޭސިބަސްވެސް އެނގޭ. މައުލޫމާތު ހޯދުމުގެ ރިފަރެންސްތަކަށް ރުޖޫއަވުމުގެ ގާބިލްކަންވެސް އެމީހުންގެ ޝަހްސިއްޔަތުގައި އެބަހުރި. އެކަމަކު އެމީހުންނަކަށް ނެތް ހުއްދައެއް. ހަމައެކަނި ހުއްދަ މި އޮންނަނީ ބޭރުގެ ޔުނިވަރސިޓީ ތަކުގައި ކިޔަވާ ބޭފުޅުންނަށް އެކަނި.
ޝަހީމް ވިދާޅުވިއެވެ.
މިނިސްޓަރު ޝަހީމް ފާހަގަކުރެއްވި ގޮތުގައި، ފަތުވާ ދިނުމާއި ޝަރީއަތުގެ ހުކުމްތައް ބަޔާންކުރުމަކީ ވަރަށް މަތީ ކަމެއް ނަމަވެސް، މިހާރު މި ފުރުސަތު ލިބެނީ ހަމައެކަނި ރާއްޖެއިން ބޭރުގެ ޔުނިވަރސިޓީތަކުން ކިޔަވާ ނިންމާ އިލްމުވެރިންނަށް އެކަންޏެވެ. ރާއްޖޭގެ ޔުނިވަރސިޓީތަކުން ދީނީ ތައުލީމް ހާސިލުކުރާ ދަރިވަރުންނަށް، އެންމެ ކުޑަމިނުން ދީނީ ނަސޭހަތް ދިނުމުގެ ހުއްދަވެސް ނުލިބޭ ކަމަށް އޭނާ ވިދާޅުވިއެވެ.
އިސްލާމިކް މިނިސްޓަރު އިތުރަށް ފާހަގަކުރެއްވި ގޮތުގައި، ގިނަ ދަރިވަރުންނަކީ އަރަބި ބަހާއި އިނގިރޭސި ބަސް ރަނގަޅަށް އެނގޭ، އަދި ދީނީ މައުލޫމާތު ހޯދުމުގެ ރިފަރެންސްތަކަށް ރުޖޫއަވުމުގެ ޤާބިލުކަން ލިބިފައިވާ ބައެއް ނަމަވެސް، އެފަރާތްތަކަށް ދީނީ ނަސޭހަތް ދިނުމުގެ ހުއްދަ ނުލިބޭކަން ފާހަގަކުރެއްވިއެވެ.
މި ހާލަތުގެ ސަބަބުން، ރަށްރަށުގައި ތިބޭ މީހުން އިސްލާމްދީނާ ދުރުވަމުންދަނީ، އެމީހުންގެ ތެރޭގައި ދީނަށް ހިތްވަރުދޭނެ މީހުން ނެތުމުގެ ސަބަބުން ކަމަށް މިނިސްޓަރު ވިދާޅުވިއެވެ. މިގޮތުން ކޮންމެ ސްކޫލެއްގައި އިސްލާމް ޓީޗަރެއް ހުރި ނަމަވެސް، އެ ފަރާތްތަކަށް ދީނީ ނަސޭހަތް ނުދެވޭކަމާއި، ނަސޭހަތް ދިނުމަށް ޝޭޚެއް ގެންނަން ޖެހޭއިރު، ޝޭޚެއް ނުލިބިއްޖެނަމަ އެ އަތޮޅެއްގެ އެ ރަށެއްގައި ދީނީ ނަސޭހަތް ދެވެން ނޯންނަކަން ފާހަގަކުރެއްވިއެވެ.
