މާލެ ސިޓީގެ މޭޔަރު އާދަމް އާޒިމް އެ މަޤާމަށް ވަޑައިގަތުމަށްފަހު، ސިޓީ ކައުންސިލަށް ބޮޑު މުސާރާގައި އަށް ކޮންސަލްޓަންޓުން ނަގާފައިވާކަން ހާމަވެއްޖެއެވެ.
މާލޭ ސިޓީ ކައުންސިލަށް އެމްޑީޕީއަށް ނިސްބަތްވާ ކޮންސަލްޓެންޓުން ނަގާފައިވާކަން އެންމެ ފުރަތަމަ ހާމަކުރެއްވީ މޭޔަރު އާޒިމް އަމިއްލަފުޅަށެވެ. އޮކްޓޯބަރު 13 ވަނަ ދުވަހު އިދިކޮޅު އެމްޑީޕީން ހދ. ކުޅުދުއްފުށީގައި ބޭއްވި ލާމަރުކަޒީ ގުޅުން ކޮންފަރެންސްގައި ވާހަކަފުޅު ދައްކަވަމުންނެވެ. އެ ކޮންފަރެންސްގައި އާޒިމް ވިދާޅުވެފައިވަނީ، މޭޔަރުކަމަށް ވަޑައިގަތުމަށްފަހު 15 ކޮންސަލްޓަންޓުން ނަންގަވާފައިވާ ކަމަށެވެ.
މި ކަމާ ގުޅިގެން، މައުލޫމާތު ހޯދާ ލިބިގަތުމުގެ ހައްޤުގެ ޤާނޫނުގެ ދަށުން "އަދަދު" ނޫހުން ކޮންސަލްޓަންޓުންގެ ތަފްސީލު ހޯދުމަށް އެދުމުން، ސިޓީ ކައުންސިލުން ވަނީ 8 ކޮންސަލްޓެންޓެއްގެ މައުލޫމާތު އެ ނޫހާއި ހިއްސާ ކޮށްފައެވެ. އެ އަށް ކޮންސަލްޓަންޓުންގެ މުސާރައަށް މަހެއްގެ މައްޗަށް ޖުމްލަ 261,000 ރުފިޔާ ޚަރަދުވާ ކަމަށް ވެއެވެ. ނަމަވެސް ކޮންސަލްޓަންޓުން ނެގި ތާރީޚާއި އެއްބަސްވުން ނިމޭ ތާރީޚު ސިޓީ ކައުންސިލުން ހާމަކޮށްފައި ނުވާކަމަށް އެ ނޫހުން ރިޕޯޓު ކޮށްފައި ވެއެވެ.
ސިޓީ ކައުންސިލަށް ނަގާފައިވާ ކޮންސަލްޓަންޓުންގެ ތެރޭގައި ހިމެނެނީ، މަހަކު 35,000 ރުފިޔާގެ މުސާރައިގައި މުހައްމަދު ޝާހިދު (ފައިނޭންޝަލް ކޮންސަލްޓަންޓް)، ހަބީބު ޒާހިރު (ރިޕޯޓު ރައިޓިންގ ކޮންސަލްޓަންޓް)، މުހައްމަދު ޝަރީފު (ސިވިލް އިންޖިނިއަރިންގ ކޮންސަލްޓަންޓް)، އަދި މުހައްމަދު ޝިހާބު (ސޯޝަލް ވެލްފެއަރ ކޮންސަލްޓަންޓް) އެވެ. މީގެ އިތުރުން، މަރިޔަމް ނާޒިމާ (އެޑްމިނިސްޓްރޭޓިވް ކޮންސަލްޓަންޓް) އަދި އަލީ ޚާލިދު (މީޑިއާ އެގްޒެކެޓިވް) އަށް މަހަކު 28,000 ރުފިޔާ، ރަމްޒީ އަބޫބަކުރު (މެނޭޖްމަންޓް ކޮންސަލްޓަންޓް) އަށް 30,000 ރުފިޔާ، އަދި ޔަމީން މުހައްމަދު (އައިޓީ ކޮންސަލްޓަންޓް) އަށް 35,000 ރުފިޔާގެ މުސާރަ ލިބިވަޑައިގަންނަވައެވެ. މީގެ ތެރެއިން ބައެއް ކޮންސަލްޓަންޓުންނަށް އިތުރުގަޑީގެ އިނާޔަތުގެ ގޮތުގައި މުސާރައިގެ 50 އިންސައްތަ ލިބިވަޑައިގަންނަވައެވެ.
ސިޓީ ކައުންސިލުން ރަސްމީކޮށް ހާމަކޮށްފައި މި މައުލޫމާތާ، މޭޔަރު އާޒިމް ކުރިން ވިދާޅުވެފައިވާ އަދަދާ ދިމާނުވާތީ، ދިމާނުވާކަން ފާހަގަ ކޮށްލެވެއެވެ. އޭގެ ތަފްސީލެއް ސިޓީ ކައުންސިލުން އަދި މިހާތަނަށް ހާމަކޮށްފައެއް ނުވެއެވެ.
