އިސްލާމީ ފަތުވާދޭ އެންމެ މަތީ މަޖިލީހާއި، އިސްލާމީ ކަންތައްތަކާ ބެހޭ ވުޒާރާއިން ގުޅިގެން ރާއްޖޭގައި މިހާތަނަށް ބާއްވާ ފުރަތަމަ 'ފަތުވާ މަހާސިންތާ' ފަށައިފިއެވެ. "މުޖުތަމައު އިސްލާހު ކުރުމުގައި ފަތުވާގެ ދައުރު" މި ނަމުގައި ބޭއްވޭ މި މަހާސިންތާގެ މައިގަނޑު މަޤްސަދަކީ ދިވެހިރާއްޖޭގައި ދީނީ އެއްބައިވަންތަކަން ހިމާޔަތްކޮށް، އިސްލާމްދީނުގެ މަތިވެރި ދަންމަރު ފެތުރުމަށް މަސައްކަތްކުރާ ފަރާތްތަކަށް އެއްތަނަކުން މަޝްވަރާކޮށް، ޚިޔާލު ބަދަލުކުރުމުގެ ފުރުސަތު ހޯދައިދިނުމެވެ.
މަހާސިންތާ ފެށުމުގެ ރަސްމިއްޔާތުގައި ވާހަކަފުޅު ދައްކަވަމުން، އިސްލާމީ ކަންތައްތަކާ ބެހޭ ވަޒީރު، ޑރ. މުހައްމަދު ޝަހީމް އަލީ ސައީދު ވިދާޅުވެފައިވަނީ، އިސްލާމީ ފިޤުހުގައި ފަތުވާގެ މަޤާމަކީ ވަރަށް މަތިވެރި މަޤާމެއްކަމަށާއި، ޝަރުއީ ހުކުމެއް ބަޔާންކުރުމުގެ ކުރިން އެކަމެއްގެ ހަޤީޤަތް ތަސައްވުރުކުރުމަކީ ޝަރުއީ ޤަވާއިދެއްކަމަށެވެ. އަދި މިޒަމާނުގައި ކުރިމަތިވެފައިވާ ޒަމާނީ ފިޤުހީ މައްސަލަތަކުގައި، ހުކުމްތައް ބަޔާންކުރަންވާނީ ޖަމާއީގޮތުން މަޝްވަރާކޮށްގެން ކަމަށާއި، އެފަދަ ކަންކަމުގައި ފަރުދީގޮތުން ފަތުވާދިނުމަކީ އިސްލާމީ މުޖުތަމައު ބައިބައިވެގެން ހިނގައިދާނެ ކަމެއްކަމަށް އެމަނިކުފާނު ވިދާޅުވިއެވެ.
ވަޒީރު އިތުރަށް ފާހަގަކުރެއްވި ގޮތުގައި، ރާއްޖޭގެ ފަތުވާގެ ނިޒާމު ހަރުދަނާކުރުމަކީ ސަރުކާރުގެ ސިޔާސަތެއް ކަމަށާއި، ދީނީ އެއްބައިވަންތަކަން ޤާއިމުކުރެއްވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިސްކަންދެއްވާ ކަމަށެވެ. މިގޮތުން ގިނަ ދުވަސްތަކެއް ވަންދެން ފަތުވާ ކައުންސިލްގެ މެންބަރުން ހަމަނުވެ އޮތް އޮތުން ނިމުމަކަށް ގެނެސް، ޤާނޫނުގައި ބުނާ ފުރިހަމަ އަދަދަށް މެންބަރުން އައްޔަންކުރައްވާފައިވާ ކަމަށްވެސް ވިދާޅުވިއެވެ.
މި މަހާސިންތާގައި ރާއްޖޭގެ އެންމެ ފާހަގަކޮށްލެވޭ ދީނީ އިލްމުވެރިން ބައިވެރިވާގޮތަށް ޕެނަލް ޑިސްކަޝަންތަކެއް ކުރިއަށް ގެންދިއުމަށް ވަނީ ހަމަޖެހިފައެވެ. ވަޒީރު އިތުރަށް ވިދާޅުވެފައިވަނީ، ރާއްޖޭގައި ވައުޒާއި އިރުޝާދާއި ފަތުވާ ދިނުން ދަރަޖަކުރުމާމެދު އިލްމުވެރިންގެ މަޝްވަރާ ބޭނުންވާ ކަމަށާއި، އިސްލާމީ ކަންކަން ހިންގުމުގައި އިލްމުވެރިން ދެއްވާ ލަފާފުޅުތަކަށް އަބަދުވެސް އިހްތިރާމްކުރާނެ ކަމުގެ ޔަޤީންކަން ދެއްވާފައެވެ.
