ރައީސް މުޢިއްޒަށް ފެންނަނީ ވަރަށް ބޮޑަށް އެބޭފުޅާގެ ތާޢީދު ރާއްޖޭގެ އެކި ކަންކޮޅުތަކުގައި އިތުރުވަމުންދާ ބޭފުޅެއްގެ ގޮތުގައިކަމަށް ރައްޔިތުންގެ މަޖިލީހުގެ ރައީސް އަދި ވެރިކަންކުރާ ޕީއެންސީގެ ޗެއަރޕާސަން ޢަބްދުއްރަޙީމް ޢަބްދުﷲ ވިދާޅުވެއްޖެއެވެ.
އަބުދުއްރަހީމް މިހެން ވިދާޅުވ ޕީއެސްއެމް ނިއުސްއިން ގެނެސްދޭ ހަފްތާ 52 ޕްރޮގްރާމުގައި ވާހަކަފުޅު ދައްކަވަމުންނެވެ.
މި ޕްރޮގްރާމްގައި ވާހަކަ ދައްކަވަމުން އަބުދުއްރަހީމް ވިދާޅުވީ، ރައީސުލްޖުމްހޫރިއްޔާ ޑރ. މުހައްމަދު މުއިއްޒަކީ ރާއްޖޭގެ ފެހި ޤާނޫނު އަސާސީގެ ދަށުން ދެވަނަ ދައުރެއް ފުރިހަމަކުރައްވާނެ ފުރަތަމަ ރައީސްކަމުގައި ވެގެންދާނެކަމުގައެވެ.
މަޖިލީހުގެ ރައީސް އިތުރަށް ވިދާޅުވެފައިވަނީ، އެމަނިކުފާނު ސިޔާސީ ހިސާބު ޖައްސަވަނީ ރާއްޖޭގެ ސިޔާސީ މަޝްރަހު ވަރަށް ރަނގަޅަށް ދެނެވަޑައިގެންކަމަށެވެ. އެގޮތުން ރާއްޖޭގެ އުތުރުން ފެށިގެން ދެކުނާ ހަމައަށް، ކޮންމެ ރަށެއްގެ ސިޔާސީ ފިކުރާއި ރައްޔިތުންގެ ވިސްނުން އެނގިވަޑައިގަންނަވާކަމަށް އެމަނިކުފާނު ފާހަގަކުރެއްވިއެވެ. މިގޮތުން ހއ. ވަށަފަރުގައި އިންތިޚާބެއްގެ ހިސާބު ޖަހާއިރު، އެރަށުގައި ތިބޭނީ ކޮންބައެއްކަމާއި، އެމީހުންގެ ވިސްނުމާއި، އުޅޭތަނާއި، އިސްކޮޅާއި، ވާހަކަދައްކާ ގޮތްވެސް އެނގިވަޑައިގަންނަވާކަމަށް ވިދާޅުވިއެވެ.
ކުރިއަށް އޮތް ހަތަރު އަހަރަށް ބައްލަވާއިރު، ރައީސް މުއިއްޒުގެ ސަރުކާރު ވަރަށް ކާމިޔާބު ކަމަށް ފެނިވަޑައިގަންނަވާ ކަމަށާއި، އަދި ގޮންޖެހުންތަކާއި ފާޑުކިޔުންތަކާ ކުރިމަތިލައިގެން ކާމިޔާބު ހޯދުމަށް ފަސޭހަވާނެކަމަށް މަޖިލީހުގެ ރައީސް ވިދާޅުވިއެވެ. އަދި ރައްޔިތުންގެ ތާއީދު ރައީސް މުއިއްޒަށް އިތުރުވަމުންދާއިރު، ބައެއް ސިޔާސީ ލީޑަރުންގެ ތަރި އޮއްސެމުންދާކަމަށްވެސް ފާހަގަކުރެއްވިއެވެ.
އެއީ އިތުރުފުޅު ހެއްދެވުމާ، މާބޮޑަށް ޒާތީވެވަޑައިގަތުމާ، ސިޔާސީ ބުރަދަނެއް ނެތްބަޔަކު ބުނާގޮތަކަށް ކަންތައްތައްކުރުމާ، މިކަހަލަ ކަންކަންތައްތަކަކާހެދި ބައެއް ސިޔާސީ ލީޑަރުން ދިވެހިރާއްޖޭގެ ސިޔާސީ އުދަރެހުން އެބޭފުޅުންގެ ސިޔާސީ ތަރި އޮއްސެމުންދާއިރު، ރައީސް ޑރ. މުޙައްމަދު މުޢިއްޒަށް އަޅުގަނޑަށް ފެންނަނީ ވަރަށް ބޮޑަށް އެބޭފުޅާގެ ތާޢީދު އިތުރުވާ ބޭފުޅެއްގެ ގޮތުގައި.
ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވިއެވެ.
މަޖިލީހުގެ ރައީސް އިތުރަށް ވިދާޅުވެފައިވަނީ، އަންނަ އަހަރުގެ ދައުލަތުގެ ބަޖެޓުގައި، ރާއްޖޭގެ ތާރީޚުގައި މިހާތަނަށް ދުވަހަކުވެސް ނުހިނގާވަރަށް ތަރައްޤީގެ މަޝްރޫއުތައް ހިންގޭނެކަން ފެންނަން އޮތް ކަމަށެވެ. އަދި ދައުރުގެ ފުރަތަމަ އަހަރު ނިންމާލެވިފައިވަނީ ވަރަށް ކާމިޔާބުކޮށް ކަމަށާއި، ރައްޔިތުންނަށް ބޭނުންވާ ގިނަ ކަންތައްތަކެއް ފުއްދައިދެވިފައިވާކަމަށްވެސް އެމަނިކުފާނު ވިދާޅުވިއެވެ.
