ސަރުކާރު ހިންގާ މައި ޕާޓީ، ޕީޕަލްސް ނޭޝަނަލް ކޮންގްރެސް (ޕީއެންސީ)ގެ އެތެރޭގެ އިންތިޚާބު މިއަދު ހެނދުނު 10:00 ގައި ފެށިއްޖެއެވެ. ޕީއެންސީން މަޢުލޫމާތު ދިންގޮތުގައި، ވޯޓުލުން މެންދުރުފަހު 14:00 އާ ހަމައަށް ކުރިއަށްދާނެއެވެ.
މިއީ ރާއްޖޭގައި ސިޔާސީ ޕާޓީއަކުން މިހާތަނަށް ބާއްވާ، އެތެރޭގެ އެންމެ ބޮޑު އިންތިޚާބު ކަމުގައި އެޕާޓީން ފާހަގަ ކޮށްފައި ވެއެވެ. މި އިންތިޚާބުގައި ޖުމްލަ 2095 މަޤާމަކަށް މެންބަރުން އިންތިޚާބުކުރެވޭނެއެވެ. އެހެންނަމަވެސް ގިނަ ރަށްތަކުގައި އިންތިޚާބަކާ ނުލައި ދާއިރާތަކުގެ ރައީސުންނާއި ނައިބުން ވަނީ ހޮވިފައެވެ.
މި އިންތިޚާބުގައި ވޯޓުލާ މަރުކަޒުތައް ވަނީ ރަށްރަށުގެ ސްކޫލުތަކުގައި ޤާއިމުކުރެވިފައެވެ. މާލޭގެ ދާއިރާތަކާއި އަތޮޅުތަކުގެ ފޮށިތައް ބަހައްޓާފައިވަނީ ދަރުބާރުގޭގައެވެ. އަދި ހުޅުމާލޭގެ ދާއިރާތަކުގެ ފޮށި ރެހެންދި ސްކޫލުގައި، ވިލިމާލެ ދާއިރާގެ ފޮށި މުޙިއްޔުއްދީން ސްކޫލުގައި ވަނީ ބަހައްޓާފައެވެ.
ޕީއެންސީގެ އެތެރޭގެ އިންތިޚާބަށް ކުރިމަތިލުމުގެ ފުރުސަތު ހުޅުވާލީ މިދިޔަ ސެޕްޓެންބަރު 11 ވަނަ ދުވަހުއެވެ. އަދި ކުރިމަތިލުމުގެ މުއްދަތު ހަމަވީ މިދިޔަ މަހުގެ 24 ވަނަ ދުވަހުއެވެ. މި އިންތިޚާބުގައި ހޮވާނީ ދާއިރާތަކުގެ ރައީސުންނާއި ނައިބުރައީސުންގެ އިތުރުން ރަށްރަށުގެ ޒުވާނުންގެ ހަރަކާތުގެ ރައީސުންނާއި އަންހެނުންގެ ހަރަކާތުގެ ރައީސުންނެވެ. މީގެ އިތުރުން ސްޓިއަރިން ކޮމިޓީތަކުގެ މެންބަރުންވެސް ހޮވޭނެއެވެ.
ކޮންމެ ރަށެއްގައިވެސް ސްޓިއަރިން ކޮމިޓީއެއް އެކުލަވާލެވޭނެއެވެ. އާބާދީ 3000 އަށްވުރެ ކުޑަ ރަށްރަށުގައި 7 މެންބަރުންގެ ކޮމިޓީއެއް އެކުލަވާލެވޭއިރު، އާބާދީ 3000 އަށްވުރެ ބޮޑު ރަށްރަށުގައި 9 މެންބަރުންގެ ސްޓިއަރިން ކޮމިޓީއެއް އެކުލަވާލެވޭނެއެވެ.
