މޯލްޑިވްސް އިމިގްރޭޝަނުން ބުރާސްފަތި ދުވަހު ހެނދުނު ތިލަފުށީގައި ހިންގި ހާއްސަ ރެއިޑް އޮޕަރޭޝަނެއްގައި 33 ބިދޭސީން ވަނީ އިމިގްރޭޝަނުގެ ބެލުމުގެ ދަށަށް ގެންގޮސްފައެވެ.
މި އޮޕަރޭޝަންގައި އިމިގްރޭޝަނުގެ 28 އޮފިސަރުންނާއި ފުލުހުންގެ 35 އޮފިސަރުން ބައިވެރިވެ، 257 ބިދޭސީން ޗެކުކުރިއެވެ. އޭގެ ތެރެއިން 33 ބިދޭސީންނަކީ ސައްހަ ވިސާއެއް ނެތި އުޅެމުންދިޔަ މީހުންނެވެ. އަދި 22 ފަރާތަކަށް ވަނީ ލިޔުމުން ނޯޓިސް ދީފައެވެ.
ހޯމްލޭންޑް ސެކިއުރިޓީ އެންޑް ޓެކްނޯލޮޖީ މިނިސްޓަރު އަލީ އިހުސާން ވިދާޅުވި ގޮތުގައި މިހާތަނަށް ރާއްޖެއިން ވަނީ 5،000 އަށްވުރެ ގިނަ ބިދޭސީން ޑިޕޯޓުކޮށްފައެވެ.
އޭގެ ތެރޭގައި ހިމެނެނީ ސައްހަ ވިސާ ނެތި އުޅެމުންދިޔަ މީހުންނާއި މަސްތުވާތަކެތި، ވައްކަން އަދި ހަށިވިއްކުން ފަދަ ކުށްތަކަށް އަރައިގަތް ބިދޭސީންނެވެ.
