ޕީޕަލްސް ނޭޝަނަލް ކޮންގްރެސް (ޕީއެންސީ) ގެ އެތެރޭގެ އިންތިހާބު މާދަމާ (23 ނޮވެމްބަރު) އަށް ބޭއްވުމަށް ނިންމައިފިއެވެ. މިއީ އެކި ފަހަރު މަތިން ފަސްކުރެވެމުން އައި އިންތިހާބެކެވެ.
މި އިންތިހާބު އެންމެ ފުރަތަމަ ބޭއްވުމަށް ހަމަޖެހިފައިވަނީ އޮކްޓޯބަރު 19 ގައެވެ. ނަމަވެސް އެ ތާރީޚު ބަދަލުކޮށް ނޮވެމްބަރު 9 އަށް ފަސްކުރެވުނެވެ. އޭގެ ފަހުން އަނެއްކާވެސް އިތުރު ބަދަލެއް ގެނެސް، ނޮވެމްބަރު 1 ވަނަ ދުވަހު ނެރުނު ބަޔާނެއްގައި އިންތިހާބު ނޮވެމްބަރު 23 އަށް ފަސްކުރި ކަމަށް ހާމަކުރިއެވެ.
އެންމެ ފަހުން އިންތިހާބު ފަސްކުރަން ޖެހުނު ސަބަބަކީ ޖުމްހޫރީ ދުވަހާ ގުޅިގެން ނޮވެމްބަރު 10 ވަނަ ދުވަސް ރަސްމީ ބަންދު ދުވަހެއްގެ ގޮތުގައި ރައީސް ޑރ. މުހައްމަދު މުއިއްޒު ހަމަޖެއްސެވުމާ ގުޅިގެންނެވެ. އެ ހަފްތާ ބަންދުގައި ގިނަ ބަޔަކު ރަށުން ބޭރަށް ދަތުރުކުރުމަށް ހަމަޖެހިފައިވާތީ، ނޮވެމްބަރު 9 ގައި ވޯޓުލުމުގައި މެންބަރުންނަށް ދަތިތަކާ ކުރިމަތިލާން ޖެހިދާނެ ކަމަށް ފެނުނެވެ. އެހެންކަމުން ކެންޑިޑޭޓުންނާއި މެންބަރުންގެ އެދުމުގެ މަތިން އިންތިހާބު ފަސްކުރެވުނެވެ.
މިހާރު ކެމްޕޭނުތައް ފޯރިގަދަ ކަމާއެކު ކުރިއަށްދާއިރު، މި އިންތިހާބުގައި ޕާޓީގެ 59 ދާއިރާއަކަށް މެންބަރުން އިންތިހާބުކުރެވޭނެއެވެ. އިންތިހާބަށް ކުރިމަތިލި ކެންޑިޑޭޓުންގެ ނަންތައް މިހާރު ވަނީ ތަރުތީބުކޮށް އާންމުކޮށްފައެވެ. އަދި ބައެއް ދާއިރާތަކުގައި ވާދަވެރި ކެންޑިޑޭޓުން ނެތުމުން، އެ ދާއިރާތަކުގެ ކެންޑިޑޭޓުން ވަނީ އިންތިހާބަކާ ނުލައި ހޮވިފައެވެ.
