މަޖިލީހުގެ މަސައްކަތްތައް އަވަސް ދުވެއްޔެއްގައި ކުރިއަށްދާ ކަމަށް ރައްޔިތުންގެ މަޖިލީހުގެ ރައީސް ޢަބްދުއްރަޙީމް ޢަބްދުﷲ ވިދާޅުވެއްޖެއެވެ. ޕީއެސްއެމްގެ "ހަފްތާ 52″ ޕްރޮގްރާމުގައި ވާހަކަފުޅު ދައްކަވަމުން، މަޖިލީހުގެ ރައީސް ފާހަގަކުރެއްވި ގޮތުގައި ކުރީގެ މަޖިލިސްތަކާ ޚިލާފަށް، މިހާރުގެ 20 ވަނަ މަޖިލީހުގައި ބިލުތަކުގެ މަސައްކަތް ހުއްޓިފައި ފުނިޖެހިފައު ނުހުންނާނެއެވެ.
އަބުދުއްރަހީމް ވިދާޅުވީ މީގެ ކުރީގެ މަޖިލިސްތަކުން ނަތީޖާ ނުނެރެވުނީ ނިޔަތް ރަނގަޅު ނުވުމުގެ ސަބަބުންނެވެ. ނަމަވެސް މިހާރުގެ މަޖިލީހުގެ މެންބަރުންގެ އަމާޒަކީ ރައްޔިތުންނަށް ޚިދުމަތްކުރުން ކަމަށްވުމާއެކު، ރަނގަޅު ނަތީޖާ ނެރެވެމުންދާކަން ފާހަގަކުރެއްވިއެވެ.
ރައީސުލްޖުމްހޫރިއްޔާގެ ވަޢުދުތައް ފުއްދުމަށްޓަކައި ބޭނުންވާ ޤާނޫނީ އިސްލާހުތައް ގެނައުމުގެ މަސައްކަތްވެސް މަޖިލީހުން ކުރިއަށްދާކަމަށް ވިދާޅުވިއެވެ. ޕީއެންސީގެ މަޖިލިސް މެންބަރުން މަސައްކަތްކުރަމުންދަނީ އެއް އަމާޒަކަށް، އެއް ވިސްނުމެއްގައި ކަމަށާއި، މެންބަރުންގެ މެދުގައި ޚިޔާލު ތަފާތުވުމެއް ނެތްކަންވެސް ފާހަގަކުރެއްވިއެވެ.
ރައީސް މުޢިއްޒުގެ ސަރުކާރަށް އަހަރެއް ފުރުނުއިރު ގިނަ ކާމިޔާބީތަކެއް ހާސިލުކުރެވިފައިވާ ކަމަށާއި، ކުރިއަށް އޮތް ހަތަރު އަހަރުވެސް ފެންނަނީ ވަރަށް ކާމިޔާބު ދުވަސްތަކެއްގެ ގޮތުގައި ކަމަށް މަޖިލީހުގެ ރައީސް އަދި ޕީއެންސީގެ ޗެއާޕާސަން ޢަބްދުއްރަޙީމް ޢަބްދުﷲ ވިދާޅުވިއެވެ.
