ރައްޔިތުންގެ މަޖިލީހުގެ ތެރެއިން ސަރުކާރުން ބޭނުންއިރަކު ގާނޫނުއަސާސީއާ ކުޅެލެވިދާނެކަމާއި ސަރުކާރުގެ ހުދުމުހުތާރުކަން ހުރި މިންވަރު އިއްޔެ ރައްޔިތުންނަށް ދައްކާލާފާ ވާކަމަށާއި، އެހެންނަމަވެސް ރައްްޔިތުންގެ ބާރު އަލުން ހޯދައިދޭން ކުރެވެން އޮތް ހުރިހާ މަސައްކަތެއް ކުރާނެކަމުގައި އިދިކޮޅު އެމްޑީޕީން ބުނެފިއެވެ.
އިއްޔެ ރައްޔިތުންގެ މަޖިލީހުން ވަނީ ގާނޫނުއަސާސީއަށް އިސްލާހު ގެނެސް، މެންބަރަކު އިންތިހާބުވި ޕާޓީއަކުން ވަކިވުމުން ނުވަތަ ވަކިކުރުމުން އަދި އަމިއްލަގޮތުން އިންތިހާބުވި މެންބަރަކު ޕާޓީއަކާ ގުޅުމުން އެ މެންބަރެއްގެ ގޮނޑި ގެއްލޭގޮތަށް ހަމަޖައްސާފައެވެ.
މިކަމާ ގުޅިގެން ނޫސްވެރިންނާ ބައްދަލުކުރެއްވި އެމްޑީޕީގެ ޗެއާޕާސަން ފައްޔާޒު އިސްމާއީލް ވިދާޅުވީ ރައީސް ޑރ. މުހައްމަދު މުއިއްޒުގެ ސަރުކާރުން އިއްޔެ ދައްކާލީ ސަރުކާރުގެ ހުދުމުހުތާރުކަން ހުރި މިންވަރު ކަމަށެވެ. އަދި ތާއަބަދަށް ހުދުމުހުތާރުކަން ދައްކަން ރައްޔިތުން މަޑުން ނުތިބޭނެކަމަށާއި، ރައްޔިތުންގެ ބާރު އަލުން ހޯދައިދޭނެކަމުގެ ޔަގީންކަން ދެއްވިއެވެ.
ޕާޓީން ވަކިކޮށްފި ހާލަތުގައި ގޮނޑި ގެއްލޭނަމަ ރައްޔިތުން އެބަ ބުނަންޖެހޭ އާނއެކޭ އޭނާ ދުރަށް ލާން އެބަޖެހެއޭ.
މެންބަރަކު ޕާޓީން ވަކިކުރާ ހާލަތުގައި ގޮނޑި ގެއްލެންވާނީ ރައްޔިތުންގެ ބަހަކާ އެކު ކަމަށް ވަކާލާތު ކުރައްވަމުން ފައްޔާޒު ވިދާޅުވި އެވެ.
ފައްޔާޒު ވިދާޅުވިގޮތުގައި މެންބަރަކު ޕާޓީގެ ޓިކެޓްގައި އިންތިހާބުވުމަށްފަހު ޕާޓީ ބަދަލުކުރާނަމަ ގޮނޑި ގެއްލޭގޮތަށް އޮތުމަކީ އެމްޑީޕީ އަބަދުވެސް ގަބޫލުކުރާ އުސޫލެކެވެ. ނަމަވެސް މެންބަރަކު ހުންނަ ޕާޓީން ވަކިކޮށްފިނަމަ ގޮނޑި ގެއްލޭގޮތަށް އޮތުމަކީ އެއްވެސް ހަމައަކާއި އުސޫލެއް ނެތި ދޫކޮށްލެވޭނެ ކަމެއް ނޫނެވެ.
އިއްޔެ ގެނެވުނު އިސްލާހުތަކާއެކު މެންބަރުންގެ މަސައްކަތުގެ މިނިވަންކަން ގެއްލި، މެންބަރުންނަށް ތަޅުއެޅުވިފައިވާ ކަމަށް ފާހަގަކުރެއްވިއެވެ. އެމްޑީޕީއަށް މެޖޯރިޓީ ލިބިއްޖެނަމަ މި އިސްލާހުތަކަށް ބަދަލު ގެންނާނެކަމަށާއި، މެންބަރަކު ޕާޓީން ވަކިކުރާ ހާލަތުގައި ގޮނޑި ގެއްލެންވާނީ ރައްޔިތުންގެ ބަހަކާ އެކުގައި ކަމަށް ވިދާޅުވިއެވެ.
އެމްޑީޕީން އަބަދުވެސް މަސައްކަތްކުރަނީ ރައްޔިތުންގެ ހައްގުތައް ވީހާވެސް ފުޅާކޮށް ކަށަވަރުކުރުމަށް ކަމަށާއި، އެހެންނަމަވެސް ޕީއެންސީގެ ވިސްނުމަކީ ރައްޔިތުން "ތަޅުއެޅުވުން" ކަމަށްވެސް ފައްޔާޒު ވިދާޅުވިއެވެ.
