އެ ކޯޓު އަންނަ ޑިސެންބަރު މަހުގެ އެއްވަނަ ދުވަހުން ފެށިގެން ރިސެސްއަށް ދާނެކަން ސުޕްރީމް ކޯޓުން ހާމަކޮށްފިއެވެ. ސުޕްރިމް ކޯޓުން ނެރުނު ދެންނެވުމުގައި ބަޔާންކޮށްފައިވާ ގޮތުން، ދިވެހިރާއްޖޭގެ ކޯޓުތަކުގެ ގާނޫނުގެ ހަތްވަނަ މާއްދާއާ އެއްގޮތްވާ ގޮތުގެ މަތިން، ރިސެސް މުއްދަތު ފެށޭނީ 2024 ނޮވެންބަރު މަހުގެ އެންމެ ފަހު ރަސްމީ މަސައްކަތު ދުވަހުން ފެށިގެން 2025 ޖަނަވަރީ މަހުގެ އެންމެ ފުރަތަމަ ރަސްމީ މަސައްކަތު ދުވަހާ ހަމައަށެވެ.
ކޯޓުތަކާ ބެހޭ ގާނޫނުގެ ހަތްވަނަ މާއްދާގައި ބަޔާންކުރާ ގޮތުން، ސުޕްރީމް ކޯޓުގެ ފަނޑިޔާރުންގެ މަޖިލީހުގެ އަޣުލަބިއްޔަތުން އެހެން ގޮތަކަށް ނުނިންމާހާ ހިނދަކު، ކޮންމެ އަހަރެއްގެވެސް ކޯޓުގެ އަހަރީ ދައުރު ފެށޭނީ ޖަނަވަރީ މަހުގެ ފުރަތަމަ ރަސްމީ މަސައްކަތު ދުވަހުގައެވެ. އަދި އަހަރީ ދައުރު ނިމޭނީ ނޮވެންބަރު މަހުގެ ފަހު ހަފުތާގެ ފަހު ރަސްމީ މަސައްކަތު ދުވަހުގައެވެ.
ރިސެސް މުއްދަތުގައި، ކޯޓުތަކުގެ ގާނޫނުގެ ހަތްވަނަ މާއްދާގެ (ނ) އާއި (ރ) ގައި ބަޔާންކުރާ ހާލަތްތަކާއި، ގާނޫނުއަސާސީ ނުވަތަ ގާނޫނެއްގެ ދަށުން ވަކި މުއްދަތެއްގައި ނިންމަންޖެހޭ ކަންކަން ފިޔަވައި އެހެން އެއްވެސް ޝަރީއަތުގެ އަޑުއެހުމެއް ނުބޭއްވޭނެއެވެ. ނަމަވެސް މި މުއްދަތުގައިވެސް ކޯޓަށް އާ މައްސަލަތައް ބަލައިގަތުމާއި އެހެނިހެން އިދާރީ މަސައްކަތްތައް މެދުކެނޑުމެއްނެތި ކުރިއަށްދާނެ ކަމަށް ސުޕްރީމް ކޯޓުން އަންގާފައިވެއެވެ.
ކޮމެންޓު ފޮނުވާ