ގާނޫނު އަސާސީއަށް އިސްލާހު ގެނައުމުގެ ބިލް ފަސްކުރުމަށް މިއަދު ހަވީރު ޖަލްސާއެއް ބާއްވަން ތާވަލު ކޮށްފިއެވެ.
މިއަދު ހެނދުނު މަޖިލީހުގައި މި އިޞްލާޙާ ގުޅޭގޮތުން ބަހުސްކުރެވުނެވެ. އޭގެ ފަހުން ނެގުނު ވޯޓުގައި 69 މެންބަރުން ފެންނަކަމަށް ވޯޓުދެއްވި އިރު، 12 މެންބަރުން ނުފެންނަކަމަށް ވޯޓުދެއްވިއެވެ. މި ބިލު ދިރާސާކުރުމަށް މުޅި މަޖިލީހުގެ ކޮމިޓީއަށް ފޮނުވައި، އެ ކޮމިޓީގެ މަސައްކަތް ވަނީ ފެށިފައެވެ.
މި އިޞްލާޙުގައި ހިމެނޭ މައިގަނޑު ކަންތައްތަކުގެ ތެރޭގައި، މަޖިލިސް މެންބަރަކު އިންތިޚާބުވި ޕާޓީ ބަދަލުކުރައްވައިފިނަމަ އެ މެންބަރެއްގެ ގޮނޑި ގެއްލޭގޮތަށް ހަމަޖެއްސުން ހިމެނެއެވެ. މީގެ އިތުރުން، ރާއްޖޭގެ ސަރަހައްދަށް ބަދަލެއް ގެނައުމުގެ ކުރިން މަޖިލީހުގެ ތިންބައިކުޅަ ދެބައިގެ ރުހުން ހޯދަންޖެހޭ ގޮތަށް ބަދަލުކުރުމާއި، ރައީސުލްޖުމްހޫރިއްޔާއަށް އިތުރު ބާރުތަކެއް ދިނުން ހިމެނެއެވެ. އަދި އަސްކަރީ ބޭނުމަށް ބޭރުގެ ސިފައިން ގެނައުމުގައި މަޖިލީހުގެ އަޣުލަބިއްޔަތު ހޯދަންޖެހޭ ގޮތަށް ހަމަޖެއްސުންވެސް ހިމެނެއެވެ.
މި ބިލާ ގުޅޭ އިތުރު މަސައްކަތްތައް ކުރިއަށް ގެންދިއުމަށް މިއަދު ހަވީރު 5:30 ގައި މަޖިލީހުގެ ޖަލްސާއެއް ބޭއްވުމަށް ވަނީ ތާވަލުކުރެވިފައެވެ. މި ޖަލްސާގައި ކޮމިޓީން ދިރާސާކޮށް ނިންމި ގޮތުގެ ރިޕޯޓް ހުށަހެޅުމާއި، ވޯޓަށް އެހުން ހިމެނެއެވެ.
މަޖިލިސް މެންބަރުންގެ ގޮނޑި ގެއްލޭ ގޮތަށް މީގެ ކުރިން ވެސް ވަނީ ގާނޫނެއް އެކުލަވާލާފައެވެ. އެއީ ރައީސް ޔާމީންގެ ވެރިކަމުގައެވެ. ނަމަވެސް، އެމްޑީޕީން ވެރިކަމަށް އައުމަށްފަހު އެ ގާނޫނު އުވާލިއެވެ. އެހެންނަމަވެސް، މަޖިލީހުގެ މިދިޔަ ދައުރުގެ ފަހުކޮޅު އެމްޑީޕީން އަނެއްކާވެސް މިފަދަ ގާނޫނެއް ވަނީ ތަޢާރަފްކޮށްފައެވެ.
