މަޖިލިސް މެންބަރުން ޕާޓީ ބަދަލުކުރުމުން އެމީހުންގެ މެންބަރުކަން ގެއްލޭ ގޮތަށް ގާނޫނުއަސާސީއަށް ގެންނަ އިސްލާހު ރައްޔިތުންގެ މަޖިލީހުގެ ކޮމިޓީން ފާސްކޮށްފިއެވެ.
ސަރުކާރުގެ ފަރާތުން މި އިސްލާހު ހުށަހެޅުއްވީ ހުޅުދޫ ދާއިރާގެ މެންބަރު މުހައްމަދު ޝާހިދެވެ.
މި އިސްލާހުގެ ދަށުން، ވަކި ސިޔާސީ ޕާޓީއެއްގެ ފަރާތުން މަޖިލީހަށް އިންތިހާބުވެފައިވާ މެންބަރަކު، އެ ދައުރުގެ ތެރޭގައި އެ ޕާޓީން އަމިއްލައަށް ވަކިވުމުން ނުވަތަ ޕާޓީން އެ މެންބަރަކު ވަކިކުރުމުން، ނުވަތަ އެހެން ޕާޓީއަކަށް ބަދަލުވުމުން، އެ މެންބަރެއްގެ މަޖިލިސް މެންބަރުކަން ގެއްލޭނެއެވެ.
މީގެ އިތުރުން، އަމިއްލަ ގޮތުން ކުރިމަތިލައިގެން އިންތިހާބުވެފައިވާ މެންބަރަކު، އެ ދައުރުގެ ތެރޭގައި އެއްވެސް ސިޔާސީ ޕާޓީއަކާ ގުޅިއްޖެނަމަވެސް، އެ މެންބަރެއްގެ މަޖިލިސް މެންބަރުކަން ގެއްލޭނެއެވެ.
