ރައްޔިތުންގެ މަޖިލީހުގައި މިއަދު ނެގުނު ވޯޓަކުން އިޒްރޭލް ޕާސްޕޯޓު ރާއްޖޭގައި މަނާކުރުމުގެ ބިލުގެ މަސައްކަތް އަވަސްކުރުމަށް ގޮވާލައި އެމްޑީޕީން ހުށަހެޅި ގަރާރު ބޭރުކޮށްލައިފައެވެ.
ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) ހުށަހެޅުއްވި މި ގަރާރާ މެދު ވޯޓަށް އެހުމުން، 63 މެންބަރުން ވޯޓު ދެއްވީ ގަރާރު ބަލައިނުގަތުމަށެވެ. 15 މެންބަރުން ވޯޓު ދެއްވީ ގަރާރު ބަލައިގަތުމަށެވެ. އަދި އެންމެ މެންބަރަކު ވަކި ގޮތަކަށް ވޯޓު ނުދެއްވައެވެ.
ކުޑޫ ހުށަހެޅުއްވި ގަރާރުގައި ފާހަގަކުރައްވާފައިވަނީ، ފަލަސްތީނުގެ ރައްޔިތުންގެ މައްޗަށް ހިންގަމުންދާ އަނިޔާވެރި އަމަލުތަކާ ގުޅިގެން ސަރުކާރުން އަޅާފައިވާ ހަމައެކަނި ފިޔަވަޅަކީ އެކަން ކުށްވެރިކުރުން ކަމަށެވެ. އިޒްރޭލް ޕާސްޕޯޓު ރާއްޖެއަށް މަނާކުރުމަށް ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް އިމިގްރޭޝަން ގާނޫނަށް އިސްލާހެއް ހުށަހެޅުއްވުމާ ގުޅިގެން، ސަރުކާރުން ވަނީ ކެބިނެޓް ބައްދަލުވުމެއްގައި އެކަން ކުރަން ނިންމާފައެވެ. ނަމަވެސް މިހާތަނަށް އެއްވެސް އަމަލީ ފިޔަވަޅެއް އަޅާފައެއް ނުވެއެވެ.
ކުޑޫ ވިދާޅުވި ގޮތުގައި މި ބިލު މަޖިލީހުގެ 241 ކޮމިޓީގައި އޮންނަތާ ހަތަރު މަސް ވެއްޖެއެވެ. އެހެންނަމަވެސް މަޖިލީހުގެ އަޣުލަބިއްޔަތު އޮތް ސަރުކާރު ހިންގާ ޕާޓީން، އެ ފަރާތުން ބޭނުންވާ ކަންކަން ދައުރުން ބޭރުގައި ވެސް ޖަލްސާ ބާއްވައިގެން ނިންމަމުން ގެންދެއެވެ. އެހެންކަމުން މި ގަރާރު ހުށަހެޅުއްވި ބޭނުމަކީ އިމިގްރޭޝަން ގާނޫނަށް ހުށަހެޅިފައިވާ އިސްލާހުގެ މަސައްކަތް އަވަސްކުރުމަށް ސަރުކާރަށް ގޮވާލުމެވެ.
