އަންނަ އަހަރަށް ހުށަހެޅި 56.6 ބިލިއަން ރުފިޔާގެ ބަޖެޓްގެ ބަހުސް މިއަދު ނިންމާލައިފިއެވެ. މިދިޔަ މަހުގެ 31 ވަނަ ދުވަހު ހުށަހެޅި ބަޖެޓަށް މި މަހުގެ 12 ވަނަ ދުވަހު ފެށުނު ބަހުސްގައި 77 މެންބަރުން ބައިވެރިވެ، ޖުމުލަ 14 ގަޑިއިރާއި 17 މިނެޓު ހޭދަކުރިއެވެ.
ބަޖެޓާ މެދު މަޖިލީހުގައި ދެކެވުނު ވާހަކަތަކުގައި، ވަކިވަކި ރަށްރަށުގެ މަޝްރޫއުތަކަށް ކަނޑައެޅިފައިވާ ފައިސާގެ ތަފްސީލު ނެތުމާމެދު އިދިކޮޅު ފަރާތްތަކުން ކަންބޮޑުވުން ފާޅުކޮށްފައިވެއެވެ. ނަމަވެސް، ސަރުކާރަށް ތާއީދުކުރާ މެންބަރުން ފާހަގަކުރެއްވި ގޮތުގައި ކުރީގެ ބަޖެޓުތަކުގައި ތަފްސީލު ހިމެނި ނަމަވެސް، ރައްޔިތުން ބޭނުންވި މިންވަރަށް މަޝްރޫއުތައް ނިމިފައެއް ނުވެއެވެ.
އިމާރާތްކުރުމާއި ބިނާވެށީގެ ވަޒީރު ޑރ. އަބްދުﷲ މުއްޠަލިބު ވިދާޅުވެފައިވަނީ ކުރީގައި ބަޖެޓުގައި މަޝްރޫއުތައް ހިމެނީ އިންތިޚާބުތަކަށް ރައްޔިތުންނާއި މެންބަރުން ރުއްސުމަށް ކަމަށާއި، ބޭނުންވާ ފައިސާ ނެތި މަޝްރޫއުތައް ކުރިއަށް ގެންދެވޭނެ ކަމަށް ނުދެކޭ ކަމަށެވެ. މިހާރު ބަޖެޓު ބަހުސް ނިމި، ދެން އޮތީ ބަޖެޓު ކޮމިޓީގެ ރިޕޯޓު ތަޅުމަށް ހުށަހަޅައި ބަޖެޓު ފާސްކުރުމެވެ.
