ސަރުކާރުގެ ހަރުދަނާ މާލީ ސިޔާސަތުތަކުގެ ސަބަބުން މިއަހަރު ބަޖެޓު ޑެފިސިޓު 378 މިލިއަން ރުފިޔާއިން ކުޑަކުރެވި، 3.6 އިންސައްތައަށް ދަށްކުރެވިފައިވާކަމަށް ޕީއެންސީއިން މިއަދު ނެރުނު ބަޔާނެއްގައި ހާމަކޮށްފިއެވެ.
ފާއިތުވި އަހަރުތަކުގައި ދައުލަތުގެ ހަރަދުތައް އަހަރަކު 15 އިންސައްތައިން އިތުރުވަމުން ދިޔަނަމަވެސް، މިއަހަރު އެ ނިސްބަތް ވަނީ 2.5 އިންސައްތައަށް ދަށްކުރެވިފައެވެ. އަދި ކުރީ ސަރުކާރުން ރެކޯޑު ނުކުރާ ބައެއް ހަރަދުތައް މިއަހަރުގެ ހަރަދުތަކުގެ ތެރެއަށް ހިމަނަން ޖެހުނު ނަމަވެސް، އެކަމާ ގުޅޭ މައްސަލަތައް ވަނީ ހައްލުކުރެވިފައެވެ. މިހާރު ދައުލަތުގެ ހަރަދާއި އާމްދަނީގެ ތަފްސީލު ކޮންމެ ހަފްތާއަކު އެއްފަހަރު ފިނޭންސް މިނިސްޓްރީން އާންމުކުރަމުން ގެންދެއެވެ.
ސަރުކާރުގެ ހާމަކަން ބޮޑު ސިޔާސަތުގެ ދަށުން، ފާއިތުވި އަހަރު 70 އަށްވުރެ ގިނަ ނޫސްވެރިންގެ ބައްދަލުވުން ބޭއްވި އިރު، 700 އަށްވުރެ ގިނަ ފަހަރު ސަރުކާރުގެ ވަޒީރުން މީޑިއާތަކަށް މައުލޫމާތު ދެއްވިއެވެ. އަދި ކުރީ ސަރުކާރާ ހިލާފަށް، މިހާރު ދައުލަތުގެ ކުންފުނިތަކުން އާރްޓީއައި އަށް ޖަވާބުދާރީވަމުން ގެންދާކަންވެސް ޕީއެންސީން ފާހަގަކޮށްފައިވެއެވެ.
